Ерөнхий сайд Л.Оюун-Эрдэнэ: Төрийн байгууллагаас шаарддаг 1000 гаруй зөвшөөрөлийг 50 хувиар бууруулна

"Авлигын эсрэг үндэсний чуулган-2021" өнөөдөр болж байна. Ерөнхий сайд Л.Оюун-Эрдэнэ тус арга хэмжээнд оролцож, үг хэллээ.

Тэрбээр "Төр хөгжлийг чөдөрлөгч биш дэмжигч, сэдэлжүүлэгч байх чин хүсэл эрмэлзэл бидэнд байгаа. Үүнийг бодит ажил хэрэг болгохын тулд дор бүрнээ хичээж ажиллах нь чухал юм.
Тиймээс цаашид авлигыг бууруулахын тулд төрийн албыг цахимжуулах явдал чухал байна. Ерөнхий сайдын хувьд цахим шилжилтийг бүх талаас нь дэмжиж байгаа. Цаашид төрийн худалдан авалтыг цахимжуулна. Шалгуур хангасан компани автоматаар сонгогддог системд шилжүүлнэ.

 Төрийн үйлчилгээнд хүний хүчин зүйлийн хамаарлыг бууруулж, цахимжуулах замаар авлига, төрийн хүнд суртлыг халж, ил тод, шуурхай, нээлттэй болгох суурь шинэчлэлүүдийг хийж дуусгана.

2024 он гэхэд бизнес эрхлэхэд төрийн байгууллагаас шаарддаг 1000 гаруй зөвшөөрөл, техникийн нөхцөл, гарын үсэг, гэрээний тоог 50 хувиар бууруулан, хүний хүчин зүйлийг багасгана.

Төрийн зарим чиг үүргийг хувийн хэвшил, мэргэжлийн холбоодод шилжүүлэх ажлыг 2022 оны төсвийн жилээс эхлүүлж, төрийн бүтээмж, төсвийн зарцуулалтын үр ашгийг сайжруулна.