Маргааш хөгжимчин Ч.Марал-Одын “VIVACE” VIP тоглолт ганцхан удаа тоглогдоно

Хөгжимчин Ч.Марал-Од бие даасан гурав дахь тоглолтоо 12 дугаар сарын 03-ны өдөр “On,n Off Production house”-д 19 цагаас зохион байгуулах гэж байна. Тэрээр гурав дахь бие даасан тоглолтондоо урт хугацаанд бэлдсэн бөгөөд сайхан бүхнээ үзэгч танд зориулан тоглох гэж байна.

Үзэгч та бүхэн энэхүү тоглолтын талаарх дэлгэрэнгүй мэдээллийг 88064604 утаснаас авах боломжтой.

Хөгжимчин Ч.Марал-Одын тухайд 1990 онд Ховд аймгийн Эрдэнэбүрэн суманд төрсөн. Хөгжим бүжгийн коллеж, СУИС-ыг дүүргэсэн бөгөөд  2016-2017 онд БНСАУ-ын ОУ-ын Соёлын солилцооны тэтгэлэгт хөтөлбөр, 2020-2021 онд Монголын Урлагийн Зөвлөлийн Залуу манлайлагч тэтгэлэгт хөтөлбөрийг тус тус төгссөн юм.

2012, 2018 онуудад бие даасан тоглолтоо амжилттай зохион байгуулж байсан бөгөөд энэ удаа 3 дахь бие даасан тоглолтоо хийх гэж байна.

Ч.Марал-Одын 2010 оноос хойш нийслэлийн “Улаанбаатар” чуулгад ажиллаж байгаа аж. Энэ хугацаандаа монголын ардын урлагийг эх орондоо төдийгүй гадаадын улс оронд таниулан сурталчилсаар иржээ. Түүний энэ нөр их хөдөлмөрийг төр засаг өндрөөр үнэлж 2018 онд МУСТА цол тэмдэгээр шагнаж байв.

Үзэгч та бүхнийг залуу хөгжимчин Ч.Марал-Одын оюун ухаан, сэтгэхүйд урлагдсан уянгат хөгжмийн аялгуутай нэгэн үдшийг хамт өнгөрөөхийг урьж байна.