ЭМЯ өндөр үнээр амны хаалт худалдан авсан хэргийг АТГ шалгаж байна

“Энхийн шүүдэр” ХХК 1500 төгрөгөөр импортлосон нэг ширхэг маскыг Эрүүл мэндийн яаманд 20 мянган төгрөгөөр нийлүүлсэн талаар мэдээллийг бид “Төсвийг мөшгөе” нэвтрүүлгээрээ хүргэсэн. Төсвийн мөнгөнд үрэлгэн хандаж, 14 дахин нугалсан үнээр их хэмжээний амны хаалт худалдан авсан талаар тухайн үеийн Эрүүл мэндийн сайд болон холбогдох албаны хүмүүсээс тодруулахад “мэдэхгүй” гэх хариултыг өгсөн юм. Тэгвэл уг асуудлыг АТГ шалгаж эхэлжээ.

“Энхийн шүүдэр” ХХК N95 маскийг 2020 оны 4 дүгээр сарын 9-ний өдөр БНХАУ-аас нэгжийн үнэ нь 50 цент буюу 1424 төгрөгөөр импортлосон бөгөөд ЭМЯ-тай хийсэн гэрээндээ маскны нэг ширхэгийн үнийг 20 мянган төгрөгөөр тооцож нийт 149,7 мянган ширхэгийг 2,9 тэрбум төгрөгөөр нийлүүлэх гэрээг 2020 оны 11 дүгээр сарын 11-нд хийсэн байдаг. Энхийн шүүдэр компани нь Мөнхийн тун, Монос, Нахиа зэрэг томоохон компаниудын хөрөнгө оруулалттай бөгөөд хөрөнгө оруулагчдын нэг болох Мөнхийн тун ХХК нь мөн ЭМЯ-нд их хэмжээний хамгаалах хэрэгсэл нийлүүлсэн нь анхаарал татаж байна. Тус компани Эрүүл мэндийн яаманд 29,6 тэрбум төгрөгийн үнэ бүхий хамгаалах хэрэгсэл, халат зэргийг нийлүүлсэн бөгөөд 2020 оны Ковид-19 цар тахлын эсрэг арга хэмжээнд ЭМЯ-наас зарцуулсан төсвийн ¼-ийг эзэлж байна.