Корона вирусийн шинэ мутаци ДОХ-той хүний биед бүрэлдсэн байж болзошгүй

Сүүлийн өдрүүдэд цар тахлын тархалтын талаарх  таатай бас таагүй мэдээгээр арвин байлаа. Таатай нь гэвэл коронавирусийн хамгийн халдвартай гэгдэж байсан “Делта” хувилбар хэт олон мутацид орж, улмаар цаашид хуваагдан олшрох боломжгүй болсноор өөрийгөө устгасан байж болзошгүй тухай мэдээж. Японд COVID-19-ийн тархал цөөрч, халдвар тохиолдолгүй өдөр ч гарч байсныг генетикчид ингэж тайлбарласан байсан. Гэхдээ энэ тайлбар дээр бүгд санал нийлэхгүй байгааг хэлэх хэрэгтэй.

 Хамгийн ихээр анхаарал татсан бас хамгийн таагүй мэдээ нь Африкаас, бүр тодруулбал Өмнөд Африкийн Бүгд найрамдах Улсаас COVID-19-ийг үүсгэгч вирусийн онцгой халдвартай байж болзошгүй шинэ хувилбар илэрсэн явдал юм. 

 “B.1.1.529” гэсэн нэр авсан шинэ вирус нь маш олон тооны мутацитай байгаад судлаачид ихэд түгшиж байгаа юм байна. Өмнө Африкаас илэрсэн вирусийн энэ мутацийн холбогч уурагт 32 мутацитай байгаа бол өндөр халдвартай гэгдэж байсан “Дельта” хувилбарт ердөө найман мутацитай.

 Ийм олон мутаци байгаа учраас хүний дархлалын систем вирусийг таньж устгахад бэрхшээлтэй болсон байна. Дүрсэлбэл, олон мутацитай Өмнөд Африкийн вирус нь хүний дархлааны эсүүдээс зугтдаг. Шинжлэх ухаанд үүнийг “дархлаанаас зугтах” буюу “Immune Escape” гэж нэрлэдэг юм байна. Үүний үр дүнд хүнд хийсэн COVID-19-ийн эсрэг вакцин идэвхтэй үйлчилж чадахаа байдаг аж. 

 B.1.1.529 хувилбарт илэрсэн мутациуд нь вирусийн халдварлах чадварыг нэмэгдүүлж, дархлааны эсүүдийн өөрийг нь ялган таних чадварт сөргөөр нөлөөлдөг болохыг 

 “UCL Genetics Institute” судалгааны төвийн тэргүүн Франсуа Баллугийн таамаглаж байгаагаар Өмнөд Африкийн вирус ингэж их мутацитай байгаа нь ДОХ-ын хүнд хэлбэрээр өвдсөн, дархлаа нь маш ихээр суларсан хүний биед халдварласан корона вирус таатай нөхцөлд хувиран өөрчлөгдсөнтэй холбоотой байж болзошгүй юм байна. 

 Одоогоор энэ маш аюултай мутацид орсон B.1.1.529 корона вирусийн 10 тохиолдлыг л албан ёсоор бүртгээд байгаа юм байна. Африк тивийн Ботсвана болон Өмнө Африкт тус бүр гурав ба зургаан тохиолдолд, мөн Өмнөд Африкаас Хонконгд ирсэн нэг хүнээс хоёр долоо хоногийн өмнө илэрсэн байна. 

 Дэлхийн эрүүл мэндийн байгууллагаас B.1.1.529 мутацийг “омикрон” үсгээр тэмдэглэж байхаар болжээ. Омикрон гэдэг нь Грек цагаан толгойн 15 дах үсэг.

 Онц халдвартай шинэ мутаци илэрсэн учраас дэлхийн улс орнууд шил шилээ даран Африкийн улс орнууд түүн дотроо Өмнөд Африктай хийх бүх нислэгийг хориглож эхэлжээ. Одоогоор ОХУ, Герман, Израйл, Их Британи, Сингапур, Бахрейн, Итали, Нидерланд, Марокко, Франц, Чех, Австри, Малайз, Саудын Араб, Швейцар, Турк, Канад, АНУ, Арабын Нэгдсэн Эмират, Египет, Аргентин, Бразил, Австрали зэрэг улсууд Африкийн улсууд руу хийх нислэгүүдээ бүгдийг цуцалж, тэндээс ирж байгаа хүмүүст хилээ хаасан байна.