Ч.Өнөрбаяр: Ерөнхийлөгч “Богд Зонхова”-ын төсөвт хориг тавих ёстой байсан

Ардчилсан намаас өнөөдөр /2021.11.25/  4:11 ээлжит мэдээллээ Төрийн ордонд хийлээ. 

Ардчилсан намын бүлгийн дарга Д.Ганбат:  Миний бие Улсын дээд шүүх, Сонгуулийн ерөнхий хороонд хандсан. Монгол Улс хууль дүрэмтэй улс. Тийм учраас иргэн, аж ахуй нэгж, улс төрийн нам ч бай хууль дүрэмдээ захирагдах ёстой. Сонгуулийн ерөнхий хорооноос албан бичиг ирүүлсэн. Уг албан бичигт танаас 2021 оны арваннэгдүгээр сарын 9-ний өдөр ирсэн хүсэлттэй танилцлаа. Улсын бүртгэлийн ерөнхий газрын 2021 оны наймдугаар сарын 9-ний өдрийн албан бичгээр ирүүлсэн лавлагаа, Улсын дээд шүүхийн 2021 оны наймдугаар сарын 9-ний өдрийн албан бичгээр ирүүлсэн мэдээлэл, нийслэл дэх захиргааны хэргийн анхан шатны шүүхийн 2021 оны наймдугаар сарын 9-ний өдрийн албан бичгээр ирүүлсэн мэдээлэл, Улсын дээд шүүхийн Тамгын газрын 2021 оны долдугаар сарын 20-ны өдрийн албан бичгээр ирүүлсэн мэдээлэлд үндэслэн 2021 оны наймдугаар сарын 13-ны өдрийн 70 дугаар тогтоолоор Ардчилсан намыг Монгол Улсын Их Хурлын сонгуулийн 18, 28 дугаарт хийсэн нөхөн сонгуульд оролцуулахаар бүртгэсэн болно гэсэн бичиг ирүүлсэн.Улсын дээд шүүх хуулийн хугацаанд бичгээ ирүүлэх байх. Ардчилсан нам Монголын хоёр баганы нэг. Бид удаа дараагийн сонгуульд амжилтгүй оролцсон. Гэхдээ ард түмэн маань Ардчилсан нам хуулийн дагуу эв зүйгээ олоосой гэж хүсч буй. Бид хичээж ажиллана.

Ардчилсан намын дэд дарга Ц.Оюундарь:

-Бид бүлгээрээ дамжуулан эрх баригчид ирээдүйн өв санд халдаж, төсвийг үр дүнгүй зарцуулах гэсэн халдлагуудыг хуульд заасан бүхий л аргаар эсэргүүцэж байгаа. Одоо УИХ-аар хэлэлцэж буй Хувь хүний мэдээллийг хамгаалах тухай хуулийн төсөл дээр тав хоногийн завсарлага авсан. Төсвийн талаар эрх баригчдын есөн ноцтой алдааг эмхэтгэсэн богино видео бэлтгэсэн. Хувь хүний мэдээллийг хамгаалах тухай хуулийн ард та бүхний мэдээлэл олж авах эрхийг ноцтой зөрчиж буй. Уг хуульд олон нийтэд нээллтэй 67 төрлийн мэдээлэл байгаа. Хаалттай мэдээлэл нь 6000 гарсан. Төрийн нууц гэдэг хаалттай мэдээлэл нь 600 гаруй болсон. 

Ардчилсан намын Ерөнхий нарийн бичгийн дарга Ч.Өнөрбаяр:

 Хувь хүний мэдээллийг хамгаалах тухай хуулийн төсөл дээр тав хоногийн завсарлага авсан байсан. Учир нь зарчмын хувьд болохгүй зүйл байна. Энэ бүрэн УИХ дээр хэлэлцүүлгийн явцад хасагдах байх гэж найдаж буй. Үндсэн хууль дээр төр, байгууллага, хувь хүний нууцын тухай хууль гэж бий. Эрх баригчид хуучин засаглаж байхад Байгууллагын нууцын тухай хуулийг өргөн хүрээнд тавьж, тухайн үеийн хуулийн дөрөвдүгээр зүйлд байгууллагын дарга нь байгууллагынхаа нууцыг тогтооно гэж тусгаж байсан. Энийг дагаад төрийн байгууллагын сайд, дарга нар өөрсдийнхөө болохгүй бүтэхгүй зүйлийг хааж, нуудаг байсан. Ардчилсан намын үед ийм байж болохгүй гээд Нийтийн сонсголын хууль, төсөв мөнгөтэй холбоотой Шилэн дансны тухай хууль гэх мэт төрийн байгууллагын ил тод байдалтай холбоотой олон хуулийн шинэтгэлийг хийсэн. Гэтэл эрх баригчдын оруулж ирж байгаа хуулийн төсөл нь их сайхан нэртэй, дотор нь эсрэг зарчимтай байх жишээтэй. Нэг талдаа хүний эрхийг хамгаална гэж яриад байдаг ч хэлэлцэж буй хуулиарааа түүнийхээ эсрэг хууль баталж болохгүй шүү дээ. Үндсэн хуулиа өшгөлдөг төр байх ёсгүй. Бид цаашдаа эрх баригчдын өөдөөс үгээ хэлж, шүүмжилсэн иргэдийг хамгаалсан чиглэл рүү бодлого гаргаад явж байна. Харамсалтай нь өнөөдрийг хүртэл нийтийн сонсголын асуудал нь гацаанд орчихлоо. Нийтийн сонсголыг нэн даруй хийх ёстой. Энэ жил хамгийн ихээр хүний эрхийг уландаа гишгэлээ. Эдийн засгийн эрх чөлөөг хамгийн их боомилсон. Цөөн гишүүн 32 тэрбум төгрөгөөр тоглодог байж болохгүй. Ерөнхийлөгч энэ асуудлаар Засгийн газарт чиглэл өгөхөөс илүүтэй хориг тавих ёстой байсан.