АТГ: АТҮТ-ийн мэргэжилтэн Б-ийн өрөөнд шалгалт хийхэд 27 удаагийн үйлдлээр авилга авсан нь тогтоогдсон

Чингэлтэй дүүргийн тавдугаар хороонд байрлах "Нисдэг машин" төвийн 3 давхарт байрлах АТҮТ-ийн салбарт АТГ-аас нэгжлэг хийж, холбогдох албан тушаалтнуудыг шалгаж эхэлсэн талаар бид өчигдөр мэдээлсэн. 

Уг мэдээллийн дараа АТҮТ-өөс "Зарим сайтад худал мэдээлэл цацагдсан. Улмаар мэдээллээ нягталж байж нийтэлнэ үү" гэсэн утга бүхий мэдэгдэл гаргасан юм. Тэгвэл дээрх шалгалт нь үнэн болохыг АТГ-аас мэдэгдлээ. Тодруулбал, Авлигатай тэмцэх газраас явуулсан мөрдөн шалгах ажиллагааны дүнд Авто тээврийн үндэсний төвийн Мэргэшсэн жолоочийн тасгийн мэргэжилтэн Б-г бусдаас хахууль авсан, эрх мэдэл, албан тушаалын байдлаа урвуулан ашигласан гэх үндэслэлээр шалгаж байна. 

Авлигатай тэмцэх газрын мөрдөгчид 2021 оны 11 дүгээр сарын 22-ны өдөр Улаанбаатар хот дахь Авто тээврийн үндэсний төвийн харьяа 4 газарт мөрдөн шалгах ажиллагаа явуулж, албан тушаалтан Б нь тус төвийн ажилтан Х-аар дамжуулан 3 удаагийн үйлдлээр хахууль авсан, мөн У гэгчээс 27 удаагийн үйлдлээр хахууль авсан, дүүргийн салбарын удирдах албан тушаалтанд 7 удаагийн хахууль зуучилж өгсөн үйлдлүүдийг илрүүлэн шалгаж байна.