Тойрогт нь баригдаж буй "Богд Зонхов"-ын хөшөөг мэдээгүй гэж гүрийцгээв

Чингэлтэй дүүргийн 5 дугаар хороонд баригдаж буй "Богд Зонхов"-ын хөшөөний "төсвийн хулгай" ил болж олон нийтийн дунд шүүмжлэл дагуулаад байна. Анх уг хөшөөг барих саналыг  УИХ-ын гишүүн Ц.Цэрэнпунцаг, Ц.Анандбазар, Ш.Адьшаа нар санаачилсан нь нотлогдов. Энэ тухай ч Ш.Адьшаа гишүүн хүлээн зөвшөөрч, тухайн үед буюу 2021 оны төсөвт 5.5 тэрбум төгрөгийн төсөвт өртөгтэйгөөр барих саналыг оруулж байжээ. Гэвч ирэх оны төсөвт Богд Зонховын хөшөөний өртөг зургаа дахин нэмэгдэж, 27 тэрбум төгрөгөөр нэмэгдснийг өнөөдөр УИХ-ын гишүүд тэр дундаа Чингэлтэй дүүргээс сонгогдсон гишүүд ч мэдээгүй өнгөрсөн гэх тэдний  тайлбар өөрсдийнхөө арьсыг хамгаалах гэсэн арга болов уу. 

Төсвийн хэлэлцүүлгүүдийн үеэр УИХ-ын гишүүд тойрогтоо ахиу хөрөнгө татахын тулд хамгийн их хөөцөлддөг. Тэгтэл тойрогт нь 32 тэрбум төгрөгийн бүтээн байгуулалт хийгдэхээр төсөв нь орж ирснийг гишүүд нь мэдээгүй өнгөрсөн гэдэгт итгэхэд бэрх. УИХ-ын гишүүн Ж.Сүхбаатар энэ тухай  "Үнэхээр хөшөө барих бол буруу. Миний хувьд хөшөө дурсгал 32 тэрбум төгрөгөөр барина гэсэн төсвийн санал явж байгааг хараагүй, энэ талаар санал шүүмжлэл гараагүй санагдана.Төсвийн байнгын хороо, Боловсрол соёл, шинжлэх ухааны байнгын хороо юу яригдсаныг мэдэхгүй. Би Төрийн байгуулалт, Хууль зүйн байнгын хорооны гишүүн" гэж жиргэжээ. 

Харин энэ тухай УИХ-ын гишүүн М.Оюунчимэг: Би ч гэсэн адилхан мэдээлэлгүй байна. Цар тахлын хүнд хэцүү үед хөшөө барих цаг нь биш. Хүүхдийн эмнэлэг, Түлэнхий төв, ХӨСҮТ гээд зайлшгүй хөрөнгө оруулалт санхүүжилт шаардлагатай газарт бас эмч, эмнэлгийн ажилтнуудын цалин хөлс нэмэх тал дээр харин НББХ тултал зүтгэсэн" гэжээ.

Тойрогтоо хийгдэх бүтээн байгуулалтын төсвийг мэдээгүй өнгөрсөн гэх тэдний хандлага жинхэнэ үү эсвэл хуурмаг уу гэдэг нь удахгүй нотлогдох биз ээ.