Д.Тогтохсүрэн: Манай бүлгийг авлига авсан гэж гүтгэсэндээ С.Ганбаатар гишүүн уучлалт гуйгаарай

УИХ-ын чуулганы хуралдаан үргэлжилж байна. Чуулганы хуралдаанаар “Төрөөс мөнгөний бодлогын талаар 2022 онд баримтлах үндсэн чиглэл батлах тухай” Улсын Их Хурлын тогтоолын төсөл /эцсийн хэлэлцүүлэг/, Шүүхийн ерөнхий зөвлөлийн шүүгч бус гишүүнийг томилох тухай асуудал, Шүүхийн сахилгын хорооны шүүгч бус гишүүнийг томилох зэрэг 10 гаруй асуудал хэлэлцэнэ. Хэлэлцэх асуудлаас өмнө зарим гишүүн байр сууриа илэрхийлэв.

УИХ-ын гишүүн С.Ганбаатар "МАН-ын бүлэг даатгалын компаниудад худалдагдсан байна, хахууль авсан гэж би үзэж байна.Жолоочийн даатгалын тухай хуулиар би горимын санал гаргая. Эрсдлээ хамтаараа үүрье гэсэн энэ хууль 1 сая жолоочийн эрх ашгийг хамгаалах байсан. Гэтэл төр авах гэж байна гэсэн ПИ-АРыг даатгалын 14 компани болон зарим гишүүд ярьсан. Өнөөдөр 1 сая жолоочийн эрх ашгийг хамгаалах талаар юу ч яриагүй. Энэ хуулийн хэлэлцэх эсэхийг нь шийдээгүй байхад Даатгалын компанийн төлөөллийг суулгасан. Оронд нь жолооч нарын төлөөллийг суулгах ёстой байсан. 14 даатгалын компанид 230 тэрбум төгрөгийг төрийн нэр барьж, албан журмын даатгалын мөнгө авсан.Үндсэн хуульд төрөөс эдийн засгийг зохицуулна гэж заасан байдаг. Энэ дагуу жолооч нарын эрх, ашгийг хамгаалах ийм хууль оруулж ирсэн байтал МАН-ын бүлэг хуулийг хэлэлцэхгүй гэсэн шийдвэрээ эргэж харахыг шаардаж байна. Энэ 14 компанийн хамгийн том нь гадаад компани шүү” гэсэн байр суурийг илэрхийлэв.

Түүний мэдэгдэлтэй холбогдуулан УИХ дахь МАН-ын бүлгийн дарга Д.Тогтохсүрэн  тайлбар хийж,  "С.Ганбаатар гишүүн эхлээд МАН-ын бүлгийн гишүүдээс уучлал гуйгаарай. 62 хүнийг доромжилж болохгүй шүү. МАН-ын бүлэг авлига авсныг тогтоогоорой. Та биднийг авлигын гэмт хэрэгт гүтгэлээ. С.Ганбаатар гишүүнд хэлсэн үгэндээ уучлалт гуйхгүй бол МАН-ын бүлэг Үндсэн хуулийн цэц болон шүүхэд хандахаа хариуцлагатайгаар мэдэгдэж байна" гэлээ.