ЭМЯ: Халдварын тархалт буурч байгаа энэ үед шинэ жилийн баяр тэмдэглэхийг дэмжихгүй

Засгийн газраас төрийн байгууллагуудыг шинэ жилийн баяр тэмдэглэхийг хориглосон шийдвэр гаргасан билээ.Харин хувийн байгууллагууд шинэ жилийн баяр тэмдэглэхээр төлөвлөж буй. Коронавирусийн халдварын тохиолдол буурч байгаа энэ үед хувийн хэвшлууд шинэ жилийн баяр тэмдэглэхийг ЭМЯ дэмжих эсэхийг бид  тодрууллаа. 

ЭМЯ-ны Эмнэлгийн тусламж, бодлого хэрэгжилтийн газрын дарга Б.Буянтогтох "Ковидын халдвар амны хаалтгүй  орчинд хамгийн өндөр тархаж байна. Баар, ресторан зэрэг үйлчилгээний байгууллагуудаар үйлчлүүлсэн иргэд маскгүй байснаас халдвар их авч байна. Иргэд шинэ жилийн баярыг маскгүй орчинд тэмдэглэх нь тодорхой.  Өнөөдөр халдварын тохиолдол буурсан энэ үед шинэ жилийн баяр тэмдэглэхийг би хувьдаа дэмжихгүй. Халдварын тохиолдол нэмэгдэх хэрээр эрүүл мэндийн салбар хамгийн ачаалалттай ажилладаг. Халдвар дөнгөж буурч байгаа энэ үед дахиад л тархалт нэмэгдвэл эрүүл мэндийн салбар горыг нь амсана. Салбарынхан маань өнгөрсөн жилийн хугацаанд өндөр ачаалалттай ажиллалаа. Халдвар хамгааллаа сайтар сахиач ээ гэж иргэдээсээ хүсье" гэлээ.