Л.Оюун-Эрдэнэ: Авлигын хэрэгт холбогдсон албан тушаалтнууд над руу хэн нэгнээр утасдуулаад ч нэмэр байхгүй шүү

Цахим засаглалд шилжих, хүнд суртал, авлигагүй төрийн үйлчилгээг бүрдүүлэх үндэсний хорооны гуравдугаар хуралдаан Төрийн ордонд өнөөдөр /2021.11.11/ боллоо. Монгол Улс авлигын индексээр 111-р байрт бичигдсэн. 

Өнгөрсөн хугацаанд авлига, албан тушаалын 1196 хэрэгт, 741 эзэн холбогдогчийг татан шалгажээ. Үүнээс 741 хэргийг нь шалгаж, 85 хэргийг эцэслэн шийдвэрлэсэн байна. Энэ тухай Ерөнхий сайд хэлэхдээ "Дээрх хэргүүд дунд таньж мэддэг ч хүн байна. Томилсон гишүүнээрээ утасдуулаад яаж ийж байгаад аргална гэдэг итгэл үнэмшил өмнө нь байсан байх. Намайг Авлигын эсрэг үндэсний хороог ахалж байгаа цагт ийм зүйлийг хийх ч үгүй шүү. Над руу хэн нэгнээр утасдуулаад ямар ч нэмэр байхгүй. Ингэж байж авлигад цэг тавихгүй бол Монгол Улсад хэн ч хөрөнгө оруулахгүй, бизнесийн энгийн орчин бүрдэхгүй. Тиймээс үүнд хатуу байна гэдгээ илэрхийлсээр байгаа. Цаашлаад шаардлагатай бол асуудлуудыг зарлаад явах эрх зүйн системд орж болзошгүй шүү. 

Авлигын Эрүүгийн хууль хөнгөн юм билээ. Байж байгаад хөөн хэлэлцэх хугацаа нь дуусчихдаг. Хэрэг хийчхээд гадагшаа гараад явчихдаг. Тэндээсээ сүртэй мэдэгдэл хийгээд явдаг. Цаашдаа эрхзүйн орчныг  цэгцлэх ёстой. Авлигын хэрэг хийчхээд хялбаршуулсан журмаар шийдэгдчихдэг, ял нь хөнгөн тул ял авч гарч ирээд олон юм ярьдаг, үүнд иргэд мөн бухимддаг. Ял авсан нь шүүхээр шийдэгдсэний дараа магадлан болон ял хөнгөрүүлэх бодлого дээр манайх их энэрэнгүй орон юм билээ. Энэ бүхнийг өөрчлөх хуулийн зохицуулалт руу орно. Авлигыг бүрдүүлж байгаа хөрс суурь юу вэ гэдэг дээр илүү нарийвчилж ажиллах шаардлага байна” гэв.