Данийн эмч нар вакцин хийлгэсэн хүмүүсээс илэрдэг COVID-19-ийн шинж тэмдгийг дурдав

Вакцин хийлгэсэн хүмүүс COVID-19 туссан ч өвчний явц нь вакцин хийлгээгүй хүмүүсийнхээс хавьгүй хөнгөн байдаг. Дани улсын халдварт өвчний тасгийн эмч, эрдэмтэд Danmarks Radio-д ярилцлага өгөхдөө энэ тухай ярьжээ.

 Мэргэжилтнүүд вакцин хийлгэсэн хүмүүст илэрдэг COVID-19-ийн шинж тэмдгийг дурджээ. Тухайлбал, вакцин хийлгэсэн хүмүүс COVID-19 туссан тохиолдолд хамгийн олон илэрдэг шинж тэмдэг нь толгой өвдөх, ханиалгах, хоолой хөндүүрлэх, найтаах, нус гоожих юм байна. Арай цөөн тохиолдолд халуурдаг бас үнэрлэх чадвараа алддаг аж.

 Үүнээс гадна корона вирусийн эсрэг вакцин хийлгэсэн ч байсан өвчний явц нь янз бүр байх тохиолдол олон байдаг аж. Тэгэхээр вакцин хийлгэсэн хүн ч гэлээ COVID-19 тусвал явц нь хүнд байж, заримдаа бүр үхэлд хүргэх аюул байна. Гэхдээ ингэж хүндрэх тун ховор тул вакцин хийлгэсэн хүн туслаа ч эмнэлэгт хэвтэж нас барах магадлал маш бага гэдгийг эрдэмтэд онцолжээ.

 Вакцин хийлгэсний дараа үүсэх үр дүн нь тухайн вакцин, тухайн хүний биеийн онцлог, нас зэрэг зүйлсээс ихээхэн хамаардаг тул гардаг дүр зураг нь янз бүр байдаг аж. Мэргэжилтнүүдийн тогтоосноор 70 ба түүнээс дээш насныханд вакцин хийлгэсний дараах үр дүн нь зургаан сарын дараа буурдаг тул үүн дээр нэмж ахин нэг тун вакцин хийлгэвэл клиник явц нь сайжирдаг юм байна.

 Гэхдээ корона вирусийн эсрэг вакцины бүх тун хийлгэлээ ч COVID-19-ийн халдвар авбал бусдад халдааж болзошгүй тул өвчнийг илрүүлэх шинжилгээ өгч байх нь маш чухал гэдгийг эрдэмтэд бас онцолжээ. Шинж тэмдэг илэрсэн хүмүүсийн хамар ба хоолой дах вирусийн тоо өндөр байдаг тул бусдад өвчин халдаах чадвар нь ч бас өндөр байдаг юм байна.