Ардчилсан намын Онц Их хурал амжилттай болж өндөрлөлөө

Ардчилсан намын Онц Их хурал /2021.11.05/ өчигдөр хуралдаж дүрмийн хүрээнд зохион байгуулалт сайтай, үр дүнтэй болж өнгөрлөө. Энэ удаагийн Их хуралд 330 сум, 21 аймаг, есөн дүүргийн 1381 төлөөлөгч оролцож  95 хувийн ирцтэйгээр хуралдав. Монгол Улсын 330 сумын Ардчилсан намын дарга нарын 300 нь Их хуралдаа биечлэн оролцож байгаа бөгөөд тэд одоо ашиглаж байгаа тамгаа бүгд авчирч намынхаа эв нэгдлийн төлөө тамгалж Ардчилсан нам анхан, дунд шатандаа хагарал хуваагдалгүй цул байгаагаа илэрхийлсэн нь онцлог байлаа. Түүнчлэн  хуралд оролцогчдын хамгийн залуу нь 18, хамгийн ахмад нь 80 настай хүн байгааг хурал даргалагч танилцуулсан. Онц Их хурлыг Улс төрийн бодлогын зөвлөлийн гишүүн Б.Батсайхан даргалж, тэргүүлэгчдээр УИХ-ын гишүүн Ж.Батсуурь, А.Адъяасүрэн, АЗХ-ны тэргүүн С.Эрдэнэболд, Б.Наранбадрах нар ажиллалаа.

 Онц Их хурлыг дэмжиж буйгаа илэрхийлж Монгол Улсын Ерөнхийлөгч асан Ц.Элбэгдорж хүрэлцэн ирж төлөөлөгчдөд хандан үг хэлсэн. Түүнчлэн Ерөнхий сайд асан Р.Амаржаргал, Н.Алтанхуяг болон УИХ дахь Ардчилсан намын бүлгийн 13 гишүүн бүгд ирэв. Мөн Ардчилсан намын үе үеийн лидерүүд, УИХ-ын гишүүн асан олон эрхмүүд хуралд оролцлоо. Онц Их хурал ажил хэрэгч байдалтай өрнөсөн бөгөөд аймаг, дүүрэг бүрийн төлөөллөөс гадна үгээ хэлж үзэл бодлоо илэрхийлэхийг хүссэн нийт 80 гаруй төлөөлөгчдийн санал бодлыг сонссон юм.

Тэд үндсэн хоёр санал гаргаж байлаа. Үүнд, Их Хуралд оролцож байгаа төлөөлөгчдийн ард Ардчилсан намын 1.3 сая гишүүн байгаа. Бид тэднийг төлөөлөн энд ирээд байгаа. Орон нутагт, анхан дунд шатандаа Ардчилсан намын гишүүд огт талцаж хуваагдаагүй нэг цул хэвээр байгаа. Тиймээс гишүүд маань үр дүнтэй хурал болоосой. Нам маань эвлэрч нэгдэж учраа ололцохгүй байгаа хэдхэн хүмүүс асуудлаа шийдэж энгийн гишүүддээ хүндэтгэлтэй хандаасай хэмээн хүлээж суугаа. Тэгэхээр  Дээд шүүхэд маргаан дагуулаад байгаа асуудлыг өнөөдрийн Онц Их хурлаар нэг мөр шийдвэрлэж  цэг тавих.

Хоёрт, Үндсэн дүрэмд өөрчлөлт оруулж намаас гишүүн хөөдгийг болиулах, намаас нэр дэвших хүн “тооноор орж” ирдэг биш анхан, дунд шатнаас сонгогддог болох гэсэн агуулга бүхий байв. Тиймээс Их хурлын тэргүүлэгчид долоон тогтоолын төсөл гаргаж санал хураалтаар тогтоолын төсөл дэмжигдэв. Түүнчлэн Ардчилсан намын даргын цахим сонгуулийг хүчингүйд тооцож,  нийт намын гишүүдийн саналаар сонгогдсон УИХ-ын гишүүн О.Цогтгэрэлийг Ардчилсан намын даргаар ёсчлон баталлаа.

Ардчилсан намын дарга О.Цогтгэрэл намын Ерөнхий нарийн бичгийн даргаар Л.Гантөмөрийн нэрийг дэвшүүлж, төлөөлөгчдийн 100 хувийн саналаар тэрээр Ардчилсан намын генсек боллоо. Л.Гантөмөр өөрийн багтаа УИХ-ын гишүүн асан З.Нарантуяа, Х.Тэмүүжин, ҮХАҮТ-ын ерөнхийлөгч О.Амартүвшин гэх зэрэг мэдлэг чадвартай хүмүүсийг урьж ажиллуулна гэдгээ илэрхийлсэн. Мөн Ардчилсан намын дарга О.Цогтгэрэл “Тэмцэл, талцалд ялагч тал гэж үгүй. Гагцхүү ганц ялалт бий нь эвлэрэл. 

Ардчилсан намын хувьд дан ганц эвлэрэл байгаад ч төр болтол бүтэцжсэн эрх баригчдыг ялж, засгийн эрхийг авах боломжгүй. Эвлэрэл дээр нэмэх нь шинэчлэл хэрэгтэй. Ийм учраас асуудал үүсгэж буй талуудын алинтай ч амин хувийн эрх ашиг, аль эсвэл үл ойлголцол байхгүй учраас эвлэрэл, нэгдлийн гүүр болъё гэж, эргэн сэргэх шинэчлэлийн элч болъё хэмээн зориглож амаргүй энэ асуудлын голоор орж Ардчилсан намын даргын сунгаанд би нэрээ дэвшүүлсэн” хэмээн хэлсэн үгэндээ онцолсон юм.  Ийнхүү Чингис хааны мэндэлсэн өдөр зохион байгуулсан Ардчилсан намын Онц Их хурал гишүүд дэмжигчдийнхээ урмыг бадраасан, маш үр дүнтэй, нэгдмэл бүтэн нам болоход нэг алхам ойртож чадсан үйл ажилллагаа болж өндөрлөлөө.