Т.​Аюурсайхан: Жолоочийн​ даатгалын сантай болвол НДС-аас огт өөр ажиллана

УИХ-ын дэд дарга Т.Аюурсайхан болон бусад нэр бүхий гишүүн Жолоочийн даатгалын тухай хуулийн шинэчилсэн найруулгын төслийг УИХ-ын  дарга Г.Занданшатарт өргөн /2021.10.27/ барьсан.  Уг хуулийн төслийг өнөөдөр /2021.11.03/ Эдийн засгийн байнгын хороо хэлэлцэхийг нь дэмжсэн.Тус  хууль батлагдвал даатгалын салбарт өрсөлдөөн байхгүй болно гэдгийг Монголын даатгалын холбоо, Монголын даатгалын зуучлагчдын холбоо, Монголын хохирол үнэлэгчдийн холбоо хамтран байр сууриа илэрхийлж буй. Тэд төрийн оролцоотой хяналтгүй сан бий болох гэж байгааг салбарынхан нь хэлж буй. Жолоочийн хариуцлагын даатгалын тухай хууль 2011 онд батлагдсан. Үүнээс хойш 14  компани жолоочийн хариуцлагын даатгалыг хийдэг. 

Хуулийн төслийн талаар хуулийг санаачлагч,  УИХ-ын гишүүн Т.Аюурсайхан хэлэхдээ "Жолоочийн хариуцлагын албан журмын даатгалыг ашгийн бус байгууллага хариуцъя гэвэл даатгалын компаниуд дампуурах гээд хүнд байдалд орох гээд байгааг сонсохоор эргэлзээ төрөөд байна. Даатгалын салбар ийм хөгжих чадваргүй болчихсон юм уу. Энд төрлийн оролцоо байхгүй. Сая гаруй жолооч даатгалын мөнгөө төлж байдаг. Өнгөрсөн өвөл нийслэлд хөл хорио тогтооход орон нутаг руу иргэдийг үе шаттайгаар тээврийн хэрэгсэл гаргаж төрөөс зөөсөн. Үүнд 1.2 тэрбум төгрөг зарцуулсан. Төрөөс даатгалын компаниудад иргэдийг зөөх санал тавихад боломжгүй гээд нэг ч төгрөг гаргаагүй.

Нийгмийн болон эрүүл мэндийн даатгал зарчмын хувьд жолоочийн хариуцлагын албан журмын даатгалаас огт өөр асуудал. Энэ хууль даатгалын компаниудыг самрахгүй. Энэ үйл ажиллагаанд төр оролцож бэлэн орлого өгснөөр даатгалын салбарын тогтолцоог ашгийн төлөө байдлаар явуулах гажуудлыг үүсгэсэн. Тиймээс бусад албан журмын даатгалын зарчмын дагуу төрийн оролцоогүйгээр ашгийн бус байгууллага хариуцна. Ашгийн бус байгууллагын удирдах байгууллагад нь төрийн болон төрийн бус байгууллага, иргэдийн төлөөлөл орно" гэлээ.