“Facebook” компани нэрээ “Мета” болгон өөрчилсөн ч олон нийтийн сүлжээнүүд нэрээ өөрчлөхгүй

“Facebook” компанийн үүсгэн байгуулагч пүрэв гарагийн орой презентаци хийхдээ тэрбум гаруй хүний анхаарлыг татсан дуулиант мэдэгдэл хийлээ. Тэрээр “Facebook” компани ребрендинг хийж нэрээ өөрчлөн цаашид “Meta” гэж нэрлэгдэж байхаар болсныг албан ёсоор зарлав. Гэхдээ компанийн мэдэлд байдаг Facebook, Instagram, Messenger, WhatsApp зэрэг олон нийтийн сүлжээнүүд нэрээ өөрчлөхгүй хэвээр хадгалж үлджээ.

 Цукерберг компанийнхаа нэрийг өөрчлөх болсон шалтгааны талаар ярихдаа “Өнөөдөр манай брэнд нь ганцхан бүтээгдэхүүнтэй дэндүү их холбоотой болсон учраас бидний өнөөдөр хийж байгаа төдийгүй ирээдүйд хийх зүйлсийг бүрэн дүрэн тусгаж чадахгүй болсон. Харин яваандаа биднийг мета ертөнц компани гэж хардаг болох байх гэж найдаж, энэ зорилгодоо цаашдын ажил болон онцлогоо холбож өгөхийг хүсэж байна” гэжээ.

 Өөрөөр хэлбэл Цукерберг нь дотор нь орсон мэт сэтгэгдэл төрүүлдэг виртуал бодит байдлын шинэ ертөнцийн байгуулж байгаа учраас нэрээ ийнхүү өөрчилжээ. “Facebook” компани нь олон нийтийн сүлжээнүүдээс гадна виртуал бодит байдлын “Oculus” төхөөрөмжийн үйлдвэрлэгч компанийг эзэмшдэг юм. Энэ оны есөн сард “Facebook” нь виртуал мета ертөнц бий болгоход 50 сая доллар төсөвлөн гаргасан. Одоогоор тусгай тоноглолын тусламжтайгаар хурал зөвлөгөөнд алсын зайнаас аватар хэлбэрээр оролцох боломж олгодог зайнаас ажиллахад зориулсан виртуал бодит байдлын программыг туршиж байгаа юм байна.

 Цукерберг энэ талаар ярихдаа “Хүн өөр хүний яг хажууд эсвэл огт өөр газар бодитоор оршиж байгаа мэт сэтгэгдэл төрүүлэх нь мета ертөнцийн онцлог давуу тал тал байх болно. Нийгмийн технологийн дээд мөрөөдөл бол өөр хүн бодитоор хажууд чинь байгаа мэт мэдрэмж төрүүлж чаддаг байх явдал” гэжээ.

 Хэрэв нэрээ өөрчлөн “Meta” компани нь виртуал ертөнц байгуулах тал дээр олон нийтийн сүлжээ байгуулсантай адил амжилттай урагшилж чадвал тун удахгүй “Ready Player One” (2018) эсвэл бүр “Матриц” шиг өөрийн гэсэн хууль дүрэмтэй мета ертөнцөд өдөр хоногийн өнгөрөөдөг болох цаг хажууд иржээ.

 Гэхдээ шүүмжлэгчдийн ярьж байгаагаар бол сүүлийн хэдэн сарын турш “Facebook” компани нь ажилтнуудтайгаа шударга бусаар харилцдаг, хэрэглэгчдээ санаатайгаар түгшүүрт автуулдаг гэх мэт янз бүрийн зүйлд буруутгагдаж, олон тооны зарга хүлээж авсан. Зарим нь бүр Цукербергийг эхнэрийнх нь хамт шүүхэд өгч их хэмжээний мөнгө нэхэмжилсэн. Харин ийнхүү нэрээ өөрчилснөөр олон нийтийн анхаарлыг өөр зүйл руу хандуулан сатааруулах, дуулиант мэдээллээр сэвтсэн нэрээ өөрчилж, имиж болон ашиг орлогоо нэмэгдүүлэх гэсэн арга төдий гэж шүүмжилж байна.