Б.Баатархүү​: С.Жавхланг албадан авчирч мэдүүлэг авна

Иргэн О.Отгонтөгс хэвлэлийн бага хурал хийж, "МУГЖ С.Жавхлан Сангийн Сайд Б.Жавхлангаас 4 тэрбум төгрөг шантаажилсан" гэсэн яриаг анх гаргасан билээ. Уг мэдээллийн дагуу МУГЖ С.Жавхлангаас мэдүүлэг авах талаар хэдэнтээ Эрүүгийн цагдаагийн албанаас дуудсан боловч тэрбээр ирээгүй байна. 

Энэ талаар ЦЕГ-ын Хэвлэл мэдээллийн төвийн дарга Б.Баатархүү мэдээлэл өглөө. Тэрбээр "МУГЖ С.Жавхлан н.Баярмагнай нар Сангийн сайдаас Хамаг монгол төслийг хэрэгжүүлнэ гэж 4 тэрбум төгрөг шанаажилсан гэсэн гэмт хэргийн шинжтэй мэдээлэл анх гарсан. Үүний дагуу аравдугаар сарын 20-ны өдөр анх мэдээллийг дэлгэсэн О.Отгонтөгс Цагдаагийн газар ирж гомдол гаргасан. Энэ дагуу Эрүүгийн цагдаагийн алба шалгаж эхэлсэн. Эрүүгийн цагдаагийн албанаас Сангийн сайд болон гурван гэрчээс мэдүүлэг авсан. Мэдүүлэг авсны дараа албаны утсаар МУГЖ С.Жавхлан руу нийт 11 удаа залгахад утсаа аваагүй. Энэ сарын 20, 21-ны өдрүүдэд мөрдөгчийн дуудах хуудас өгсөн боловч хүлээж аваагүй. Өнөөдөр прокурорын дуудах хуудас хүргүүлсэн боловч мөн ирсэнгүй. Тайлбараа янз бүрээр хэлж байна. Хууль шүүхийн өмнө хүн бүр өнөөдөр тэгш байх ёстой. Өөрөөс нь мэдүүлэг авах гэхээр ирэхгүй байхгүй учраас албан ирүүлэх арга хэмжээг авна" гэлээ.