Хилийн цэргийн 0108-р ангийн, ахлах ахлагч, спортын мастер Т.Рэнцэнбадам Дархан-Уул аймагт ирлээ

Дорноговь аймгийн Замын-Үүд суманд байрлах Хилийн цэргийн 0108 дугаар ангийн, ахлах ахлагч, спортын мастер Т.Рэнцэнбадам өмнөд хилийн отрядаас умард хилийн отряд хүртэл буюу Сэлэнгэ аймаг хүртэл 1100 км-ын холын зайд гүйхээр 2021 оны 08 дугаар сарын нэгд замдаа гарсан билээ. Тэрбээр 916 км замыг туулж 40 дэх хоногтоо Дархан-Уул аймагт хүрэлцэн ирлээ. Хилчин бүсгүйн тэсвэр тэвчээрийг харуулж яваа Хилийн цэргийн 0108 дугаар ангийн, ахлах ахлагч, спортын мастер Т.Рэнцэнбадамд Дархан-Уул аймгийн ЗДТГ-ын Цэргийн штабаас хүндэтгэл үзүүлж Авто вокзал дээр угтан авсан юм. Тэрээр Дорноговь аймгийн Хилийн 0108 дугаар ангиас Сэлэнгэ аймгийн Алтанбулаг боомтын 652 дугаар тэмдэгт хүртэл нийт 1100 километрийг туулж, Хил хамгаалах байгууллагын 88 жилийн ойн баярын өдөр буюу есдүгээр сарын 17-ны өдөр бариандаа орохоор тооцжээ.