Б.Баатархүү: Эхнэр, нөхөр хоёр их хэмжээний өртэйн улмаас амиа хорлосон эсэхийг шалгаж байна

Өчигдөр /2021.08.23/ БГД-ийн 8 дугаар хорооны нутаг дэвсгэрт байрлах зочид буудалд 30-32 насны эрэгтэй, эмэгтэй нас барсан тухай мэдээллийн талаар ЦЕГ-ын ХМТ-ийн дарга, хурандаа Б.Баатархүү сэтгүүлчдэд мэдээлэл өглөө.

Цагдаагийн байгууллагад өчигдөр /2021.08.23/ 17.30 цагт БГД-ийн 8 дугаар хорооны нутаг дэвсгэрт байрлах зочид буудлын ариун цэврийн өрөөнд хүн нас барсан байна гэх дуудлага мэдээлэл ирсэн байна. Дуудлагын дагуу цагдаагийн бие бүрэлдэхүүн очиход нэр бүхий зочид буудлын ариун цэврийн өрөөнд 30 настай эмэгтэй М, 32 настай эрэгтэй Б душны хөндлөвч төмрөөс боомилж нас барсан байжээ. Хэргийг шалгахад эхнэр, нөхөр болох талийгаач нар буудалд олон хоносон. Ямар нэгэн байдлаар гаднаас хөдөлгөөн байхгүй, өглөө гараад орой орж ирдэг, архидан согтуурсан гэх зүйлгүй байсан нь урьдчилсан байдлаар тогтоогдоод байгаа аж. ЦЕГ-ын ХМТ-ийн дарга, хурандаа Б.Баатархүү хэлэхдээ "Хэвлэл мэдээллийн хэрэгслээр явж буй зарим мэдээллүүд хэрэгт авагдсан байгаа. Гэсэн ч хэргийн шалтгаан нөхцөл эцэслэн тогтоогдоогүй байгаа учир урьдчилсан байдлаар мэдээлэл өгөх боломжгүй" гэдгийг хэлсэн юм.