Цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн биелэлтийг сар тутам нээлттэйгээр хэлэлцэж, хяналт тавих шаардлагатай бол УИХ-ын холбогдох Байнгын хорооны хуралдаанаар хэлэлцүүлэх, санал, дүгнэлт гаргах үүрэг бүхий Түр хорооны хуралдаанаар Шадар сайд С.Амарсайхан мэдээлэл өгсөн юм.

Тэрээр "Мэргэжлийн байгууллагууд, эрүүл мэндийн салбарын эрдэмтэн судлаачдын тооцооллоор вакцины бүрэн тунд иргэдээ хамруулснаар зургадугаар сарын 15-наас халдварын тоо эрс буурч эхэлнэ гэж байсан ч харамсалтай нь халдвар буурсангүй. Үүнд нөлөөлсөн хүчин зүйл нь сонгууль, шагнал урамшуулал, орон нутгийн замыг нээж хөдөлгөөн чөлөөтэй болсноор халдвар хамгааллын дэглэм алдагдсан. Мөн мутацитай холбоотой асуудал байхыг үгүйсгэхгүй гэсэн давхар дүгнэлт гарч ирж байгаа" гэдгийг хэлсэн юм.