Байден хар арьст залуусыг хамгаалахын тулд гаатай янжуурыг хорино гэв

АНУ-ын Ерөнхийлөгч Жо Байден хар арьст хүн ам, хар арьст залуусыг хамгаалахын тулд гаа болон бусад төрлийн амтлагчтай янжуур тамхийг хориглох гэж байгаа тухай “The Washington Post” сонин мэдээлж байна.

 Яагаад заавал гаатай янжуур бас зөвхөн хар арьст залуус гэж? Судалгаанаас үзвэл гаатай тамхийг хар арьст хүн ам хамгийн их хэрэглэдэг болохоор тэр аж. Улмаар хар арьстнуудын 85 хувь нь гаатай тамхинд дуртай бөгөөд үүнээсээ болж цагаан арьст тамхичдаас гурван дахин их нас баралттай байдаг аж. Байден ялсны дараа байр суурь, нөлөө нь улам бэхэжсэн хар арьстнуудын эрхийг хамгаалагчдын үзэж байгаагаар тамхи үйлдвэрлэгч компаниуд нь хар арьстнуудыг гаатай тамхинд донтуулах бодлогыг арваад жилийн өмнөөс хэрэгжүүлж эхэлсэн юм байна. Ийм учраас Ерөнхийлөгч Жо Байден гаатай тамхийг АНУ-ын нутаг дэвсгэр дээр бүр хорих шийдвэрийг энэ долоо хоногт гаргах гэж байгаа аж. Ерөнхийлөгч энэхүү шийдвэрээ Конгрессоор батлуулж дэмжлэг авах шаардлагагүй ч тамхи үйлдвэрлэгч компаниуд шийдвэрийг нь шүүхээр үгүйсгэхээр заалдана гэж мэргэжилтнүүд үзэж байгаа юм байна.