Европыг Хятадын цахилгаан машинд “эзлэгдэнэ” гэжээ

Европ тив тун удахгүй Хятадад үйлдвэрлэгдсэн цахилгаан машинуудад “бүрэн эзлэгдэнэ” гэдгийг “CNBC” тооцжээ. Европын зах зээл дэх шинэ хуулиуд ба өрсөлдөөн сул байгаагаар далимдуулан иймэрхүү “байлдан дагуулалт” хийх нь гарцаагүй гэж шинжээчид дүгнэсэн юм байна.

Хятад нь шинээр гарч ирсэн олон тооны цахилгаан машинууд бүгд ойрын үед Европын болон Америкийн  зах зээлд орж ирэх төлөвлөгөөтэй байгаа юм байна. Тухайлбал, “Nio” гэх мэт зарим брэндүүд нь хэдийн Нью-Йоркийн биржээр худалдаалагдаад эхэлж.

Европ тивийн улс орнууд Европын холбоонд нэгдсэн эсвэл нэгдээгүйгээс үл хамаараад бараг бүгд шахуу ойрын арваад жилийн дотор дотоод шаталтын хөдөлгүүр бүхий тээврийн хэрэгслээс бүрэн татгалзаж, бүгд цахилгаанаар ажилладаг машинд шилжихээр шийдэж хууль дүрэм баталж байгаа. Энэ байдал нь Хятадын цахилгаан машин үйлдвэрлэгчдэд тун таатай орчин бүрдүүлж өгч байгаа юм байна. Дээр нь Хятадын эрх баригчид 10 жилийн турш цахилгаан машины үйлдвэрлэлд гадаадын оролцоог хязгаарлаж, өөрийн компаниудыг маш идэвхтэй дэмжиж ирсэн байна.

Хятад нь 2020 оны эхний 11 сарын дотор гэхэд л 63,5 мянган ширхэг цахилгаан машин экспортод гаргажээ. Хэрэв Хятад ба Европын холбоо нь 2020 оны сүүлээр зах зээлээ харилцан нээсэн хөрөнгө оруулалтын тухай гэрээнд гарын үсэг зурсныг тооцвол 2021 онд Европт борлогдох Хятадын цахилгаан машины тоо огцом өсөх нь гарцаагүй аж.