​ Оросууд 1,3 сая рублийн хадгаламжтай бол боломжийн амьдралтай

Оросын иргэд дунджаар 1,3 сая рублийн хадгаламжтай бол боломжийн амьдарч болно гэж үздэг юм байна. Оросын “Сбербанк амь даатгал” компаниас 2021 оны гурав ба дөрөвдүгээр саруудад 500 мянгаас дээш хүн амтай 37 хотыг хамруулсан судалгаа явуулаад ийм үр дүнд хүрчээ. 

Цаашилбал хадгаламжтай оросууд нь орлогынхоо 19,8 хувийг хадгаламжид хийдэг. Үүнээс эрчүүд нь орлогынхоо 16 хувийг, эмэгтэйчүүд нь 24 хувийг хадгаламжид хийдэг юм байна. Түүнчлэн дээд боловсролтой иргэдийн 41 хувь нь хадгаламжтай, ахмад настнуудын 43 хувь нь хадгаламжтай гэсэн бол залуусын ердөө 28 хувь нь хадгаламжтай гэжээ.

Оросууд үр хүүхдүүдээ дэмжих, ирээдүйд аялал жуулчлалд зарцуулах ба гэнэтийн нөхцөл байдал үүсэхэд хэрэглэнэ гэсэн зориулалттайгаар хадгаламж үүсгэдэг гэж хариулжээ. Ингэхдээ оросуудын хөрөнгө оруулалт хийх хамгийн дуртай салбар нь үл хөдлөх хөрөнгө, удаах байранд нь рублийн банкны хадгаламж, гуравдугаарт нь бизнес хөрөнгө оруулалт болсон байна.