АНУ тулгарах сорилтуудад хүчний байр сууринаас хандаж шийдвэрлэнэ

АНУ-ын Ерөнхийлөгч Жо Байдены захиргаа нь ирээдүйд тулгарах сорилтуудад хүчний байр сууринаас хандаж байх тухай Ерөнхийлөгчийн Аюулгүй байдлын зөвлөх ЖейкСалливан мэдэгдсэн байна. Тэрээр “Fox News” сувгийн нэвтрүүлэгт оролцох үеэрээ “XXI зууны хоёр дах 25 жилийн хугацаанд тулгарах сорилтуудад АНУ нь хүчний байр сууринаас хандах ёстой гэдэгт Ерөнхийлөгч Байденитгэлтэй байгаа” гэжээ. Харин энэхүү хүчний байр сууринаас хандана гэдэг нь улс орны дотоод нөхцөл байдлыг бэхжүүлж, холбоотнуудтайгаа илүү нягт хамтран ажиллана гэсэн үг юм байна. Түүнчлэн АНУ нь олон улсын дүрэм, гэрээ хэлцээг Хятад бус АНУ бичдэг болгохын тулд Парисын цаг агаарын өөрчлөлтийг гэрээ зэрэг олон улсын институтүүдэд илүү түлхүү оролцдог болно гэсэн байна. 

Мөн АНУ нь Афганистанд явуулж байгаа цэргийн ажиллагаагаа зогсоох замаар ирээдүйд болох тулаанд бэлдэж эхэлнэ гэсэн байна. Байден нь Афганистанаас цэргээ тавдугаар сараас эхлэн гаргаад есдүгээр сар гэхэд дуусгахаар төлөвлөөд байгаа аж. Дашрамд сонирхуулахад Афганистан дах байлдааны ажиллагаа нь 2001 оны аравдугаар сард эхэлж байсан бөгөөд Америкийн түүхэн дэх хамгийн урт хугацаанд явуулж байгаа байлдааны ажиллагаа болж хувираад байгаа юм. Энэ ажиллагааны оргил үед АНУ-ын 150 мянган цэргийн албан хаагч Афганистанд үүрэг гүйцэтгэж байжээ.