Энэтхэгийн далай дахь Хятадын идэвхийг хянахад Япон улсыг урихыг санал болгожээ

Энэтхэг улсын Гадаад хэргийн сайд асан Канвал Сибал нь Энэтхэгийн далайн аюулгүй байдлын хэтийн төлөвийн талаар өгсөн ярилцлага бүс нутгийн улс орнуудын анхаарлын ихэд татсан тухай “SCMP” мэдээлсэн байна.  

Экс сайдын ярьснаар Хятад нь Энэтхэг улсыг тойруулан олон тооны түшиц газар бэлдэж, худалдаж аваад байгаа. Тухайлбал, Пакистан, Шри-Ланка улсуудын боомтуудад хөрөнгө оруулалт хийн засан сайжруулаад хяналтдаа оруулсан. Цаашлаад Энэтхэгийн далайн эрэг дээрх Жибутид цэргийн баазаа байгуулсан. Хятадын байлдааны усан онгоц, шумбагч онгоцнууд Энэтхэгийн далайд тогтмол хөвдөг болсон. Энэ бүхнийг шүүмжлэхээр “Нэг бүс-нэг зам” төслийн хүрээнд байгуулсан дэд бүтцээ хамгаалах хэрэгтэй гэдэг.  

Энэтхэгийн далайн бүс нутгийн улсууд Хятад ийнхүү чимээгүй хүчирхэгжиж, бүгдийг хяналтдаа оруулж байгааг зүгээр хараад суухыг хүсэхгүй байгаа нь  мэдээж. Иймд Энэтхэг улс гэхэд Андаманы болон Никобарын арлууд дээр цэргийн нэмэлт хүч байршуулах ажлыг хэрэгжүүлээд эхэлсэн. Эхний ээлжид эдгээр арлууд дээрх онгоц хөөрөх буух зурвасыг уртасгаж, өргөсгөх замаар илүү өндөр даацын онгоц хүлээн авдаг болгох хэрэгтэй байгаа юм байна. Цаашлаад арлыг бэхжүүлэхэд Японыг татан оролцуулах хэрэгтэй. Японы тусламжтайгаар эдгээр арлуудыг Энэтхэгийн далай дахь өвөрмөц нисэх онгоц тээгч болгон ашиглах шаардлагатай гэж үзэж байна. Улмаар энд байнга байрлах Энэтхэгийн байлдааны онгоцнууд асар өргөн уудам талбайд эргүүл хийж хянах боломжтой болно.  

Япон улс ч Энэтхэгийн энэ саналыг дэмжиж байгаа бөгөөд өнгөрсөн сард арлуудын дэд бүтцийг хөгжүүлэхэд 36 сая долларын буцалтгүй тусламж гаргаж өгчээ. Цаашдаа арлуудын дэд бүтцийг сайтар хөгжүүлснээр Япон, Энэтхэг хоёр нь Хятадын шумбагч завинуудын шилжилт хөдөлгөөнийг хянадаг болох төлөвлөгөөтэй байгаа аж. Хамгийн гол нь энэ бүхнийг АНУ маш ихээр дэмжиж байгаа юм байна.

АНУ нь өөрийн зүгээс Хятадыг тогтоон барихын тулд Азийн НАТО гэгчийг байгуулахаар чармайж байгаа аж. Үүнд Австрали, Энэтхэг, Японоос гадна Хятадтай газар нутгийн маргаантай байгаа Вьетнамын татан оролцуулах талаар идэвхтэй ажиллагаа явагдаж байгаа аж.