​ Оросын Батлан хамгаалах яам БАМ-ын хоёр дах салааг барьж эхэлнэ

Энэ сарын тавнаас Оросын Төмөр замын цэрэг нь Байгал-Амурын төмөр замын хоёр дах салааг барих ажлыг эхлүүлж байгааг тус улсын Батлан хамгаалах яамнаас мэдээлжээ. Оросын Батлан хамгаалахын орлогч сайд Д.Булгаков нь барилгын ажлыг гүйцэтгэх Познанийн улаан тугийн одонт төмөр замын бригадын байршилтай танилцах үеэрээ Батлан хамгаалахын сайд Сергей Шойгугийн тушаалаар төмөр замын зэрэг зам тавих ажил эхлүүлж байгааг мэдэгджээ. Улак өртөөнөөс Февральск хүрэх 340 км урттай салааг төмөр замын цэргийн 10 бригадын хүчээр 2024 оноос өмнө барьж дуусгах юм байна. Ингэснээр Байгал-Амурын төмөр зам буюу БАМ, Транссиб төмөр замын нэвтрүүлэх чадвар эрс нэмэгдэж, улам бүр өсөн нэмэгдэж байгаа ачааллыг даах хэмжээнд хүрэх юм байна.

Зөвлөлт задрахын өмнө байгуулан БАМ төмөр зам нь нэг үе ач холбогдлоо алдан мартагдах шахаад байсан бол ОХУ ба БНХАУ хоорондын харилцаа сайжирч, эдийн засгийн хамтын ажиллагаа нь нэмэгдэхийн хэрээр ач холбогдол нь эргээд сэргэсэн. Зүгээр ч нэг сэргэсэнгүй зарим газар төмөр замын нэвтрүүлэх чадвар, хүчин чадлыг нэмэгдүүлэх шаардлага гарсныг ийнхүү хэрэгжүүлж байгаа бололтой. Хятад нь Оросоос их хэмжээний нүүрс авч байхаар болсон мөн саяхан Суэцийн сувагт бөглөө үүсэж асар их бараа гацсан зэргээс болж БАМ-ын ач холбогдол улам нэмэгджээ.