Хятадад экскаваторын борлуулалт дээд хэмжээнд хүрчээ

Манай урд хөршид экскаваторын борлуулалт түүхэн дэх хамгийн өндөр хэмжээндээ хүрч, 2011 оны хоёрдугаар сард хүрч байсан дээд амжилтаасаа 38 хувиар давж гарсан тухай “Жэнминь жибао” мэдээлсэн байна. Хятадын удирдлага цар тахалд нэрвэгдсэн эдийн засгаа сэргээхийн тулд шинэ дэд бүтэц байгуулахад онцгой анхаарал хандуулж эхэлснийг дагаа экскаваторын эрэлт огцом өссөн аж.

Энэ оны нэгдүгээр сараас Хятадад нийт 3 их наяд юанийн өртөг бүхий олон тооны том төслийн барилгын ажил эхэлсэн. Ингээд зогсохгүй энэхүү 3 их наяд юань дээр нэмж 610 тэрбум юанийн хөрөнгө оруулалт татах тооцоотой байгаа аж.

Иймд барилга угсралтын компаниуд асар их захиалга авч, экскаватор гэх мэт барилгын машин механизмын эрэлт огцом өсжээ. Одоогоор зарим төрлийн экскаваторын нөөц ч байхгүй дуустал борлогдсон бол хамгийн эрэлт ихтэй загварын экскаваторуудыг хоёр сарын өмнөөс урьдчилан захиалж байж авах боломжтой болжээ.