Хятадад “Nike”, “Adidas”-ын эсрэг аян зарлажээ

Хятадын интернэт хэрэглэгчдийн дунд Шинжааны хөвөнг хэрэглэхээс татгалзсан Өрнөдийн брэндүүдээс татгалзах аян газар авч байгаа аж. Өрнөдийн орнууд Хятадын эрх баригчдын Шинжаанд явуулж байгаа бодлогыг эсэргүүцэн шүүмжилж, шил шилээ даран хориг арга хэмжээ авч, өрнөдийн зарим компаниуд нь Шинжаандургуулсан хөвөнгөөр хийсэн эдийн худалдаж авахаас татгалзах болсон. Тухайлбал, Шведийн “H&M” брэнд, Америкийн “Nike”, Германы “Adidas” брэндүүд үүнд өртөөд байгаа тухай “Reuters” агентлаг мэдээлжээ.

“H&M” компани энэ сарын 24-нд Шинжааны хөвөнгийн тариаланд уйгуруудыг албадан ажиллуулж байна гэж мэдэгдээд тэндээс түүсэн хөвөнгөөр хийсэн эдээс татгалзсан. Үүний дараа Хятадын интернэт хэрэглэгчид “H&M”-ийн бэлэн хувцас авахгүй байхыг уриалж эхэлжээ. Зүгээр ч нэг уриалсангүй интернэт хэрэглэгчид цаашдаа “H&M” брэндийн хувцсыг интернэтээр захиалах, худалдан авах боломжгүй болгосон байна. 

“Nike”, “Adidas”-ын хувьд тэдний хамтарч ажилладаг “Better Cotton Initiative” (BCI) ТББ нь 2020 оны аравдугаар сард Хятадын удирдлагын Шинжаанд хөвөн тариалахдаа хүний эрхийг зөрчиж байна гэж шүүмжилж, тэнд тариалсан хөвөнгөөс татгалзаж байгаагаа мэдэгдсэн. Иймд Хятадын интернэт хэрэглэгчдийн дунд “Nike”, “Adidas”-д хандан “Better Cotton Initiative” (BCI) төрийн бус байгууллагатай хамтарч ажиллахаас татгалзах эсвэл Хятадын нутагт үйл ажиллагаа зогсоохыг шаардах болсон. 

Үүнийг Хятадын үйлдвэрлэгчид чадварлагаар ашиглан “Nike”, “Adidas”-ын оронд Хятадын “Li Ning”, “Anta” брэндүүдийг худалдан авахыг интернэт хэрэглэгчдэд уриалах болсон байна. 

“Better Cotton Initiative” (BCI) нь хөвөн тариалах аргыг сайжруулах, хөвөнгийн тариалангаас байгаль орчинд үзүүлэх сөрөг нөлөөг багасгах талаар хөвөнгийн тариалан эрхэлдэг фермерийн аж ахуйнуудад сургалт явуулдаг дэлхийг хамарсан төрийн бус байгууллага. “BCI” нь дэлхийн хөвөнгийн тариалангийн 18 хувийг хянадаг бөгөөд “H&M”, “Gap”, “Benetton”, “Calvin Klein Jeans”, “Mango”, “Adidas” гэх мэт брэндүүд нь энэхүү байгууллагын аргачлалын дагуу ургуулсан хөвөн эдийн сонгон авч байгаль орчин ээлтэй брэнд гэдгээ харуулдаг.