Дэлхийн хэмжээнд ариун цэврийн цаасны хомсдол үүсэж магадгүй

Ариун цэврийн цаас үйлдвэрлэх гол түүхий эдийг Өмнөд Америкаас тээвэрлэх ачааны усан онгоц хүрэлцэхээ болсны улмаас иргэншсэн нийгмийн чухал хэрэглээ болсон энэ бүтээгдэхүүний хомсдол үүсэж магадгүй болсон тухай “Bloomberg” агентлаг мэдээлжээ.

 Ариун цэврийн цаас үйлдвэрлэхэд ашигладаг хагас боловсруулсан модны цулын дэлхийн хамгийн том нийлүүлэгч Бразилын “Suzano Papel e Celulose” компани нь далайн тээврийн контейнер дэлхийн хэмжээнд хүрэлцэхээ больсон тул түүхий эд нийлүүлэхэд асуудал гарах тухай түншүүддээ анхааруулжээ.

 “Suzano Papel e Celulose” компани нь дэлхийн модны цулын зах зээлийн 1/3-ийг эзэлдэг бөгөөд бүтээгдэхүүнээ зөөхдөө нунтаг болон овоолог ачаа зөөдөг тусгай ачааны усан онгоц ашигладаг. Гэтэл сүүлийн саруудад дэлхийн эдийн засаг сэргэж байгаатай холбоотойгоор далайн тээврийн хэмжээ огцом өссөн тул ийм тусгай онгоц хүрэлцэхгүй болсон байна.

 Ийнхүү үйлдвэрлэгчид үндсэн түүхий эдээ цаг тухайд нь хүлээн авч чадахгүй байгаагаас дэлхий хэмжээнд ариун цэврийн цаасны хомсдол үүсэж магадгүй гэдгийг “Bloomberg”  онцолжээ.