Турк гибрид пуужин бүтээхээр ажиллаж байна

Турк улс 2023 онд Саран дээр автомат төхөөрөмж хүргэж өөрийн гэсэн гибрид пуужин бүтээхээр ажиллаж байгаа гэдгийг тус улсын Аж үйлдвэрлэл ба технологийн сайд Мустафа Варанк мэдэгдсэн байна.

 Тэрээр “Anadolu” агентлагт ярилцлага өгөх үеэрээ “Пуужинг эхний удаа хөөргөхдөө бид олон улсын компаниудтай хамтарна. Гэхдээ Саран дээр хүрэх манай сансрын төхөөрөмжийг бидний өөрсдийн бүтээсэн үндэсний пуужин дэлхийн тойрог замд гаргах юм” гэжээ. Турк улс нь сансрын хөтөлбөрийг хэрэгжүүлснээр “сансрын салбарын дээд лигт орж ирнэ” гэдгийг сайд онцолжээ.

 Туркийн Ерөнхийлөгч Эрдоган нь өнгөрсөн сарын эхээр Үндэсний сансрын хөтөлбөрөө олон нийтэд танилцуулахдаа 2023 онд Сар руу сансрын төхөөрөмж илгээнэ гэж мэдэгдсэн юм. Түүнчлэн Турк нь цаг цаг агаар судлалын хиймэл дагуулууд хөөргөх, сансрын салбарын мэргэжилтнүүд бэлдэхэд онцгой анхаарах аж.

 Эрдоганыг ийм мэдэгдэл хийхээс сарын өмнө Илон Маскийн “SpaceX” компани Туркийн холбооны “Turksat 5A” хиймэл дагуулыг “Falcon 9” пуужингаараа дэлхийн тойрог замд гаргаж  өгсөн юм. Ингэснээр Турк нь дэлхийн тойрог замд дөрвөн хиймэл дагуултай болсон байна.