АНУ-д огцом хүйтэрсэнд ОХУ-ыг буруутгажээ

 АНУ даяар түүхэнд байгаагүй огцом хүйтэрсний улмаас газар сайгүй цахилгаан, шатахуун, шатдаг хийн хомсдол үүсэж, улмаар олон арван хүн осгож амиа алдсан явдал гарсан. Байгалийн энэхүү гамшигт үзэгдэл олон тэрбумын хохирол учруулсан нь ойлгомжтой. Түүнийг дагаад цаг агаарын хэвийн бус өөрчлөлтөд ОХУ-ыг буруутгаад авсанд гайхах зүйлгүй. 

 Тодруулбал, Нью-Жерсийн Ратгерсийн их сургуулийн профессор Алан Робок нь хэд хоногийн өмнө мэдэгдэл хийж, Америкийг тагнуулын албаны хүмүүс түүнд хандан дайсагнасан улс орнуудад цасан шуурга, эрс хүйтрэл бий болгож, удирдаж болох эсэхийг лавлаж асуусан тухай мэдэгдсэн юм. 

Дайсагнасан улс орнууд гэдгийг цаана хэнийг хэлээд байгаа нь ойлгомжтой. Иймд Оросын Батлан хамгаалах ба гадаад бодлогын зөвлөлийн гишүүн Александр Лосевмэдэгдэл хийжээ. 

Тэрээр АНУ-д болсон байгалийн гамшигт үзэгдэлд ОХУ ямар ч хамааралгүй гэсэн байна. Лосевын тайлбарласнаар дунд зэргийн хэмжээтэй далайн хар шуурга нь 250 мегатонн  (мега- гэдэг нь 1 сая гэдгийн товчлол юм) тротил тэсэлсэнтэй дүйцэхүйц хүчин чадалтай байдаг. Тэгвэл олон тэрбум тонн жинтэй агаарын урсгал ба далайн усыг хөдөлгөхөд ОХУ-ын бүх цөмийн зэвсэгт агуулагдаж байгаа энерги ч хангалтгүй, үүн дээр Оросын бүх цахилгаан станцуудыг үйлдвэрлэж байгаа бүх дулааны болон цахилгааны энергийг нэмсэн ч хөдөлгөж дийлэхгүй гэдгийг Лосев онцолжээ.

АНУ, Европ төдийгүй Оросыг дайрсан огцом хүйтрэлд Ла- Нинья нэртэй байгалийн үзэгдэл буруутай гэдгийг Лосев заажээ. Тухайлбал, халуун орны бүсийн жил тойрон салхилдаг пассат салхи нь 2020 оны намар Чили, Перугийн эрэг орчмын бүлээссэн усыг  Австрали, Индонезийн зүг, далайн гүн рүү хөөсөн байна. Үүнийг дагаад далайн гүнээс хүйтэн ус гадарга дээр гарч ирсэн. Үр дүнд нь Номхон далайн асар том хэсэгт их хүйт орж, түүнийг нь дагаад дэлхий даяар хүйтэрсэн юм байна.