“AstraZeneca“ вакцины гаж нөлөө их байна

“AstraZeneca“ компанийн вакцины гаж нөлөө тооцож байснаас олон гарч байгаа тул зарим улс орнуудад тус вакциныг хийхэд хязгаарлалт тогтоосон тухай мэдээ гарч байна. Тухайлбал, “The Times” –ийн бичсэнээр Италийн эмч нар 55-аас доош насны хүмүүст “AstraZeneca” вакцин хийхийг хязгаарлах хүсэлтийг удирдлагадаа гаргасан байна. Францад мөн “AstraZeneca” вакцины эхний тун хийсний дараа томууны хүнд хэлбэрийн шинж тэмдэг илэрч байгаа тул хийлгэхээс татгалзаж эхэлсэн байна. 

 Францын эмийн бэлдмэлийн аюулгүй байдлын үндэсний агентлаг “ANSM”-ийн мэдээлж буйгаар “AstraZeneca” вакциныг эмнэлгийн ажилтнуудад хийж эхэлснээс дөрөв хоногийн дотор 149 удаагийн хүндрэл гарсан тул эмч нар урт хугацааны чөлөө авахаас өөр аргагүй байдалд орж байжээ. Энэ вакциныг хийлгэсний дараа гол төлөв өндөр халуурах, толгой өвдөх шинж тэмдэг илэрч байж. Ингэхдээ вакцин хийлгэсэн эмч нарын дундаж нас 34 байсан аж. Францад 10 мянган эмнэлгийн ажилтнуудыг вакцинжуулаад байгаа юм:

 Дани улсад мөн  эмч нарыг “AstraZeneca” вакцинаар тарьж эхлэхэд дөрвөн хүн тутмын нэгд нь хүнд хэлбэрийн гаж нөлөө илэрсэн байна. Үүнээс болж тус улсын зарим мужид эмнэлгийн ажилтнуудыг вакцинжуулах ажлыг түр зогсоосон байна. Шалтгааныг нь тодруулахад эмч нарыг олноор нь нэг дор вакцинжуулбал дийлэнх нь ажиллах чадвараа түр алдан чөлөө авсан нөхцөл байдал үүсэж магадгүй болсон тул ийнхүү түр завсарласан гэжээ. 

 Улмаар Данийн хойд Ютланд нутгийн удирдлагууд нэг эмнэлгийн ажилтнуудын 50 хувийг шууд вакцинжуулах төлөвлөгөөтэй байснаа болиод нэг дор ажилтнуудынхаа гуравны нэгийг нь вакцинжуулж байхаар болсон байна.

 “AstraZeneca” компанийн төлөөлөгч Андреас Хеддини энэ их гаж нөлөөний талаар ярихдаа “Судалгааны үеэр вакцин хийлгэсэн хүмүүсийн ердөө 10 хувьд нь гаж нөлөө илэрч байсан. Бодит байдал дээр гаж нөлөө илэрсэн хүний тоо хавьгүй илүү болно гэж бид ер тооцоогүй” гэжээ.