Британийн армид 14984 цэргийн албан хаагч дутагдаж байна

Их Британийн Батлан хамгаалах яамнаас гаргасан дотоод тайланд зэвсэгт хүчинд бий болсон нөхцөл байдлыг “байж боломгүй” гэж тодорхойлсон тухай “Daily Mail” бичсэн байна. Байлдах чадвар, техникийн сүр хүчээр дэлхийн эхний аравт багтдаг армийг ийм “байж боломгүй” нөхцөлд байдалд оруулсан зүйлс нь бие бүрэлдэхүүний хомсдол юм байна. Албан хаагчдын цалин хөлс бага, шинэ цэрэг хөлслөх ажлыг хувийн компанид даатгасан учраас ийм байдалд оржээ. Жишээлбэл, Их Британийн армийн явган цэргийн 33 батальоноос ердөө ганц нь л боловсон хүчнээр бүрэн хангагдсан байдалтай байгаа аж. Британийн армийн элит анги гэгддэг Шотландгвардийн ангид ч 600 цэргийн алба хаагч дутагдаж байгаа. Нийт тус улсын Хуурай замын хүчинд 14 мянга 984 цэргийн албан хаагч шаардлагатай байгаа юм байна. 

 Афганистан дах Британийн хүчнийг удирдаж байсан хурандаа Ричард Кэмп энэ тухай мэдэгдэхдээ шинэ цэрэг хөлслөх ажлыг хувийн компанид даатган 1,3 тэрбум фунтийн гэрээ байгуулсан нь жинхэнэ сүйрэл дагуулсан шийдвэр байсан гэжээ. Ингэснээр армид элсэхээр ирсэн залуус хэт их хүнд сурталтай тулгарч, улмаар залхаж, халгахдаа хүсэлтээ буцаадаг байсан юм байна. Түүнчлэн гэрээт цэргийн албан хаагчид нь цэргийн албан хаагчдын амьдралын нөхцөл доогуур, байр орон сууцны байдал тааруу байгаа талаар гомдоллосон байна.