Трамп өөрийнх нь төлөө 75 сая хүн саналаа өгсөн гэдгийг дахин сануулав

АНУ-ын Ерөнхийлөгч Дональд Трамп Конгрессын Сенатаас импичмент зарласан явдлыг шулмын ангийн ээлжит дамжлага гэсэн байна. Сенатын гишүүд санал хураан экс Ерөнхийлөгчийг буруутгахаас татгалзсанаар Трамп цаашдын улс төрийн амьдралд нь чухал үүрэг гүйцэтгэх ялалт байгуулсан юм.  Трамп энэ талаар “NBC” сувгаар мэдэгдэл хийхдээ “Энэ бол манай улсын түүхэн дэх хамгийн том цар хүрээтэй шулмын ангийн бас нэг дамжлага байлаа. Нэг ч Ерөнхийлөгч ийм зүйлтэй таарч байгаагүй юм. Энэ бол Америкт улс төрийн нэг намын төлөөлөл нь эрх зүйг дээдлэх зарчмыг дураараа үл тоох боломжтой болсноор хууль сахиулах байгууллагуудыг харлуулж, дээрэмчдийг дэмжиж, босогчдыг зөвтгөж, шударга шүүхийн тогтолцоог улс төрийн өс авах зэмсэг болгон хувиргаад, өөрсөдтэй нь санал нийлэхгүй байгаа хүмүүсийг мөрдөж мөшгөж, үг хэлэх эрхийг боож, нухчин дарж байгаа өнөөгийн гунигт байдлын тусгал боллоо” гэсэн байна. Түүнчлэн сонгуулиар албан тушаалаа гүйцэтгэж байсан нэг ч Ерөнхийлөгчийн өмнө нь авч байгаагүй олон санал болох 75 сая америкчуудын дэмжлэгийг авсан гэдгийг Ардчисан намын өрсөлдөгчид нь мартаж чадахгүй байгаа учраас ийнхүү импичментзарласан гэж тайлбарлажээ. 

 Улмаар Трамп нь өөрийгөө хуулийг ямар ч нөхцөлд дээдлэх ёстой гэсэн зарчмыг дээдлэгч гэж мэдэгдээд хууль сахиулагчдыг хамгаалж, чухал асуудлыг үзэн ядалт, атгаг санаагүйгээр тайвнаар, нэр төртэйгөөр хэлэлцэн ярилцах эрхийн төлөө тэмцэхэд бэлэн гэсэн байна. Тэрээр ойрын хугацаанд чухал мэдэгдэл хийнэ гэдгээ мэдэгдээд “Бид тун удахгүй Америкийн гэрэлт бөгөөд хязгааргүй ирээдүйн талаарх өөрсдийн төсөөллөө танилцуулна, бидэнд хийх зүйл их байна” гэжээ.

 Хэрэв болж өнгөрсөн импичментээр Сенат нь Трамптитгэл үл үзүүлэхийн төлөө саналаа өгсөн бол экс Ерөнхийлөгч нь улс орноо иргэний дайны ирмэг дээр авчирсан буруутан болж хувираад, хуулийн нэрээр цаашид сонгуульд өрсөлдөх, нэр дэвших эрхгүй болгож, улс төрийн тавцангаас нэр мөр арчигдах ёстой байсан юм. Гэвч үнэхээр түүний хэлсэнчлэн 75 сая хүний дэмжсэн санал авсан болохоор Ерөнхийлөгчийн суудлаас буусан ч асар их нөлөөтэй улстөрч хэвээр байна.