Тэрбумтан эр ипотекийн зээлийг орчин үеийн боолчлол гэжээ

“Технониколь” компанийн хамтран эзэмшигч, тэрбумтан Игорь Рыбаков жирийн иргэдийг ипотекийн зээл авахын оронд зүтгэл гарган орлогоо нэмэгдүүлж байгаад орон сууцаа шууд бүтэн үнээр нь худалдан авч байхыг уриалсан байна. 

 Тэрбумтан эр ипотекийн зээлийн боолчлолтой зүйрлэжээ. Түүний ярьж байгаагаар орлого багатай хүмүүс банкнуудад 10-20, заримдаа бүр 30 жил зээл төлсөөр эцэст нь хоёр гурван байр авч хүрэх мөнгө илүү төлж таардаг тухай ярьжээ. Тэрээр “Хүмүүс мөнгө тоолж ерөөсөө чаддаггүй, үүнийг нь ч банкнууд ашигладаг. Тийм учраас орлогоо нэмэгдүүлэх тал дээр ажиллах нь л алсын хараатай алхам байх болно. Ажлаа сольж болно, мэргэшлээ дээшлүүлж болно, бизнес нээж болно. Шатарчин нүүдлээ тооцдог шиг бодох ёстой байдаг. Харин үүрнийхээ дэргэд өөрийгөө сайн дураар гинжээр уяад хаашаа ч үгүй болж, банкны боол болох нь хамгийн тэнэг нүүдэл” гэжээ.

 Мөн ипотекийн зээл авчхаад хугацаанаас нь өмнө төлж дуусгадаг хүмүүс ялгаагүй нарийн тооцоогүй гэжээ. Хугацаанаас нь өмнө төлж чадаж байгаа хүн банканд хандаж өрөнд оролгүй, зүгээр л мөнгөө хурааж байгаад шууд байр авах ёстой байсан хэрэг гэж Игорь Рыбаковмэдэгджээ. Тэрээр “Энд нэг тооцоо бий. Ипотек авчхаад хугацаанаас нь өмнө төлчихдөг хүмүүс байдаг гэдгийг банкнууд мэдэхийн сайнаар мэддэг. Тийм ч учраас эхний жилүүдийн эргэн төлөлт энэ тэр нь аймшигтай өндөр, хүн сэхээ өгөхөөргүй их байдаг. Тэгээд хоёр жилийн дараа нөгөө айхтар хүн чинь ипотекээ хугацаанаас нь өмнө төлж дуусаад төлсөн мөнгөө тоолохоор үсээ зулгаах хэрэг гардаг” гэж тайлбарласан байна.

 Тэрбумтны бодлоор ипотекээр зээл авсны оронд хувь нийлүүлж барилга барих, төлбөрийг цувуулж төлөх нь илүү ашигтай, тулсан үед бол байр түрээслэх нь банкны зээлээр авснаас хамаагүй дээр гэсэн байна.  Гэхдээ хамгийн зөв сонголт нь орлогоо нэмэгдүүлэх явдал гэдгийг тэрбумтан эр онцгойлжээ.