Хятадын арми Пакистанд вакцин нийлүүлжээ

БНХАУ-ын Ардын чөлөөлөх арми Пакистаны зэвсэгт хүчинд зориулан корона вирусийн эсрэг вакцин нийлүүлсэн тухай “Dawn” сонин мэдээлсэн байна. Хятадын төрийн өмчит “Sinopharm” компанид үйлдвэрлэсэн вакциныг хятадын цэргийнхэн ням гарагт нийслэл Исламабадад хүргэж ирсэн юм байна. Вакциныг Пакистаны дөрвөн мужид байрлах цэргийн гарнизоны албан хаагчдад тараан хийхээр болжээ.

 Энэ талаар Хятадын Ардын чөлөөлөх арми мэдэгдэл хийж “Корона вирусийн эсрэг вакциныг Хятадын цэргийнхнээс хүлээн авсан анхны гадаадын арми нь Пакистаны арми боллоо. Түүнчлэн “Sinopharm” компанийн бэлдмэлийг тус улсын Засгийн газрын хүсэлтийн дагуу зэвсэгт хүчинд нь зориулан явуулах гэж байна” гэжээ.

 Үүний өмнө буюу хоёрдугаар сарын 1-нд Пакистан нь БНХАУ-аас үнэ төлбөргүй өгсөн 500 мянган тун вакцин хүлээн авч, эрсдэлийн бүсэд ажиллаж байгаа эмч нар, хууль сахиулах байгууллагын ажилтнуудаа вакцинжуулсан.

 Пакистан нь аюулт өвчнөөс сэргийлэх бүх аргыг ашиглаж байгаа гэж болно. Иймдээ ч Хятадын “Sinopharm”вакцинаас гадна Оросын "Спутник V", Британи ба Шведийн “AstraZeneca” вакцинуудыг хэрэглэхийг тус тус зөвшөөрсөн, Засгийн газар нь эдгээр вакциныг ойрын үед хүлээн авахаар шургуу ажиллаж байна. Ингэснээр “AstraZeneca” вакциныг COVAX механизм ашиглан 17 сая тунг авахаар тохирсон бөгөөд эхний 7 сая тунг энэ гуравдугаар сард авахаар хүлээж байгаа юм байна. 

 Пакистанд 2020 оны хоёрдугаар сарын 26-аас хойш корона вирусийн халдвар авсан 554 мянга 474 тохиолдол албан ёсоор бүртгэгдээд байгаагаас 11 мянга 967 хүн эндэж, 510 мянга гаруй хүн эдгэрчээ.