Нипах нэртэй хүний тархийг гэмтээдэг халдвар дэгдэж магадгүй тухай анхааруулжээ

Египет дэх Хятадын ЭСЯ мэдэгдэл хийжээ

Халдвар авсан хүмүүсийн 75% хувийг үхэлд хүргэдэг аюултай Нипах нэртэй шинэ төрлийн вирусийн халдвар дэгдэж магадгүй тухай анхааруулгыг Британийн “The Guardian” сонин, Нидерландын эрдэмтэд анхааруулсан. Тухайлбал, Нидерландын “Access to Medicine” сангийн тэргүүн Жаясри К. Айера нь Нипах вирусийн халдвар хэзээ мөдгүй дэгдэж магадгүй тухай анхааруулсан явдал дэлхийн нийтийн анхаарлын төвд орсон. Түүнчлэн энэ аймшигт вирусийн дэгдэлт Хятадад гарсан тухай мэдээ гарсан. Гэтэл Хятадын тал нь үүнийг үгүйсгээд Энэтхэгт гарсан гэж мэдэгдсэн. 

 Энэхүү Нипах вирус нь томуутай төстэй шинж тэмдэгтэй бөгөөд хүний тархийг гэмтээдэг юм байна. Мөн энэ вирусийг гол түгээгч нь сарьсан багваахай гэсэн мэдээлэл тархаад байна. Нипах нь амьтадаас хүнд, хүнээс хүнд, хүнсний эд зүйлсээс хүнд дамжин халдварладаг аюултай. Аюултай вирусийн тохиолдол Хятадад бүртгэгдсэн тухай мэдээлэл гарсны дараа Египетийн Засгийн газар хамгийн соргог хандаж, бусад бүх улсаас урьтан урьдчилан сэргийлэх алхам авч эхэлсэн байна. Египетийн Засгийн газар ингэж сандрах том шалтгаан бий. Шинэ коронавирусийн цар тахлын улмаас Египетийн аялал жуулчлалын салбар 14 тэрбум долларын алдагдал хүлээсэн. 2019 онд Египетэд амарч тухлахаар 13,1 сая хүн ирж байсан бол 2020 онд 3,5 сая болж огцом буурсан байна. Иймд Египетийн эрх баригчдыг Нипахаас сэргийлэх арга хэмжээ авах гэж байгаа яриа гарсны дараа тус улс дах БНХАУ-ын ЭСЯ-аас мэдэгдэл хийж, Нипах вирусийн  дэгдэлт, тархалт нь Хятад улстай ямар ч хамааралгүй гэдгийг албан ёсоор мэдэгдсэн байна. Шинэ корона вирусийг Хятадын Ухань мужаас гаралтай гэсэн цуу яриаг АНУ-ын экс Ерөнхийлөгч Дональд Трамп эрчимтэй тарааж байсны уршгаар цар тахлын гол буруутан нь БНХАУ гэж буруутгах үзэл нэлээд хүчтэй байгаа юм.