Танилц: Шинэ засгийн газарт дэмжигдсэн эмэгтэй сайд нарын хэн нь хэн бэ?

Шинэ Ерөнхий сайд Л.Оюун-Эрдэнийн Засгийн газарт орж ажиллах эмэгтэй сайд нарыг танилцуулж байна. 

Соёлын сайдад Монгол HD сувгийн захирал Ч.Номин МАН-ын удирдах зөвлөлөөр дэмжигдсэн.

Монгол телевизийн захирал Ч.Номин нь 10 жилийн 45 дугаар дунд сургууль, Их Британийн Ийст Англиа Их Сургуулийг эдийн засгийн чиглэлээр тус тус төгссөн. 2006-2007 онд Гацуурт Группийн Гадаад Харилцааны Захирал,  2007 оноос Тэрэлж зочид буудлын Ерөнхий Менежер, 2011 оны 2 сараас эхлэн  Монгол ТВ-ийн захирлаар ажиллаж байна. Түүний аавийг Чинбат гэдэг бөгөөд Гацуурт компанийн захирал юм.

Гадаад Харилцааны сайдад Б.Батцэцэг МАН-ын удирдах зөвлөлөөр дэмжигдсэн. 

Б.Батцэцэг гэж хэн бэ?

Баянхонгор аймгийн Баянхонгор суманд төрсөн. Нөхөр, хүүхдүүдийн хамт амьдардаг. Дархан хотын 13 дугаар сургуулийг 1992 онд, МУИС-ийн Олон улсын харилцааны дээд сургуулийг 1996 онд, Санхүү, эдийн засгийн дээд сургуулийг 2000 онд, Голландын Маастрихтийн менежментийн их сургуулийг 2005 онд төгссөн. 1996-2005 онд “Мөнхийн үсэг” ХХК-ийн захирал, 2003-2004 онд “Аз хур” ХХК-ийн захирал, 2005-2010 онд Гадаадын хөрөнгө оруулалт, гадаад худалдааны агентлагт хэлтсийн дарга, 2007-2016 онд “Мөнхийн үсэг групп” ХХК-ийн ТУЗ-ийн дарга, 2010-2011 онд МАХН-ын ажлын албанд зөвлөх, 2011-2012 онд МАН-ын ажлын албанд Гадаад харилцаа, хамтын ажиллагааны хэлтсийн дарга, 2015-2016 онд Сангийн сайдын зөвлөхөөр тус тус ажиллаж байсан.  2016 оноос 2020 он хүртэл Гадаад харилцааны дэд сайдаар ажиллаж байсан нэгэн. 

Хөдөлмөр нийгмийн хамгааллын сайдаар А.Ариунзаяа үргэлжлүүлэн ажиллана. 

А.Ариунзаяа нь 1996-1999 онд Москвагийн Олон улсын харилцааны их сургууль, ХБНГУ-д коллеж төгсөж, 1999-2005 онд ХБНГУ-ын Хановерийн их сургуульд улс төр, нийгэм, түүх судлалаар мастер, 2014-2015 онд Удирдлагын академид төрийн захиргааны менежментээр магистрын зэрэг хамгаалжээ. 2005-2013 онд “Монгол даатгал” компанид хүний нөөц, даатгалын менежер, 2013 оноос МАН-д Намын байгуулалт, стратеги, төлөвлөлтийн газрын дарга, Эдийн засгийн хөгжлийн бодлогын газрын дарга, Нийгэм, эдийн засгийн бодлогын даргаар тус тус ажилласан туршлагатай нэгэн. Тэрбээр у.Хүрэлсүхийн Засгийн газарт 2020 онд ХНХ-ийн сайдаар сонгогдон ажиллажж байсан бөгөөд сайдын ажлаа үргэлжлүүлэн хийхээр МАН-ын УЗ-өөр дэмжигдээд буй.

Байгаль Орчин аялал жуулчлалын сайдаар Н.Уртнасан дэмжигдээд буй.

Н.Уртнасан нь сэтгүүлч мэргэжилтэй бөгөөд, өмнө нь тэрээр МҮОНРТ-ийн Нийгэм эдийн засгийн редакц, Шинэ дэлхий телевизэд гүйцэтгэх захирлаар  ажиллаж байжээ. Тэрбээр  Юни солар ХХК-ийн Ерөнхий захирал, НАМЭХ-ны УЗ-ийн гишүүнээр ажилладаг аж. 1993 онд Дархан хотын 17 дугаар дунд сургууль, 1994-1998 онд МУИС-ийг Сэтгүүл зүйн чиглэлээр төгссөн.
2002-2003 онд Япон улсын Токушима хотын JRT TV (Japan Radio Television) телевизэд сэтгүүлчийн мэргэжлийн дадлага, 2005 онд ХБНГУ-ын Deutsche Welle (DW TV) телевизэд мэргэжил дээшлүүлэх сургалт, 2008-2013 онд БНСУ-ын KBS, MBC телевизүүдэд мэргэжлийн сургалтад тус тус хамрагдсан.1998-2000 онд Eagle TV телевизэд сэтгүүлч, мэдээний албаны дарга, 2000-2010 онд МҮОНРТ-ийн Нийгэм, эдийн засгийн редакцид сэтгүүлч, редактор,2010-2013 онд “Шинэ дэлхий” телевизийн Мэдээний албаны дарга, Гүйцэтгэх захирал 2013 оноос хойш “Юни Си энд Си” ХХК-ийн Маркетингийн захирал, 2016 оноос “Юни солар” ХХК-ийн Ерөнхий захирлаар ажиллаж байна.