5000 орчим айлын яндан хөөлжээ

“Зөвлөмжийг дагая-Зөв хийе” компанит ажлын хүрээнд гэр хорооллын айл өрхүүдийн яндан хөөлөх үйл ажиллагаа болон угаарын хийн мэдрэгчээ зөв ашиглаж байгаа эсэхэд НМХГ, НОБГ, Тавантолгой түлш ХХК-ийн Хэрэглэгчдэд үйлчлэх албаныхан хяналт тавьж, иргэдэд мэдээлэл зөвлөгөө өглөө.

Ажлын хэсгийнхэн Сүхбаатар дүүргийн 13 дугаар хорооны иргэн Л.Пүрэвээ гуайнд очсон юм. Тэднийх гурван жилийн өмнө яндангаа хөөлснөөс хойш дахин хөөлөөгүй гэнэ. Сервис үйлчилгээний ажилтнууд тухайн айлын яндан, пийшинг хөөлж өгсөн юм. Пүрэвээ гуайнх угаарын хийн мэдрэгчээ зочны өрөөний таазанд суурьлуулжээ. Ажиллагаа хэвийн бөгөөд өнгөрсөн жил гал түлэх хугацаанд огт дуугаагүй гэнэ. Сайжруулсан түлшийн тухайд сайн халдаг, бага хэрэглээтэй сайн байгаа гэдгийг тэрээр хэлж байлаа.

Сүхбаатар дүүргийн 13 хорооны хяналтын В.Баярмагнай, “Нэг хяналтын ажилтан 200 айл хариуцдаг. Зарим нь түүнээс арай олон айл хариуцах нь ч бий. Миний хувьд энэ айлд хоёрдахь удаагаа ирж байна. Иргэдийн хувьд бидний хийж байгаа ажлыг ойлгохгүй, асуумжийг буруу зөрүү бөглөх, утасныхаа дугаарыг худлаа бичиж өгөх тохиолдол байна. Тиймээс иргэддээ хандаж хэлэхэд бидний ажлыг ойлгож, өөрсдийнхөө төлөө хийж байгаа ажил гэж бодоод утасны дугаар, гэрийн хаягаа зөв өгч, асуумж судлагаа зөв бөглөж өгч байхыг хүсье” гэсэн юм.

Аяны хүрээнд олон нийтийн сүлжээ болон хэвлэл мэдээллийн хэрэгслээр яндан хөөлөх зааварчилгаа, угаарын хийн мэдрэгчээ шалгах зааварчилгаа зэргийг контент хэлбэрээр хүргэж буй. Мөн Хэрэглэгчдэд үйлчлэх албаны хяналтын ажилтнууд 200 өрхийн зуух, пийшингийн битүүмж, угаарын хийн мэдрэгчийн хэвийн ажиллагаа зэргийг шалгаж хяналт тавьж байгаа юм.

Өнөөдрийн байдлаар 12 мянга гаруй дуудлага хүлээн авснаас 5000 орчим айлын янданг хөөлөөд байгаа аж.