Украйны удирдлага АНУ-ыг дагалдаж “Huawei”-н эсрэг арга хэмжээ авлаа

Украйны Гадаад харилцааны яам нь өчигдөр АНУ-ын улстай эв нэгдэлтэй гэдгээ батлах үүднээс БНХАУ-ын “Huawei” компанийн электрон харилцаа холбоон тоног төхөөрөмжөөс татгалзах шийдвэр гаргасан гэдгийг Америкийн Төрийн нарийн бичгийн даргын орлогч КейтКрач мэдэгдсэн байна. Тэрээр энэ тухай мэдэгдэхдээ “Украйны Гадаад харилцааны яам нь өөрийн барилгууд дээрх “Huawei” –н төхөөрөмжийг татан буулгахаар шийдвэрлэж, Засгийн газрын бусад албад ч энэ шийдвэрийг нь дагахаар болжээ” гэсэн байна. 

Түүнчлэн Украйн нь 5G сүлжээг хөгжүүлэхдээ аюулгүй байдлын үүднээс Хятадын харилцаа холбооны компаниудын үйлчилгээнээс татгалзахыг улс орнуудад уриалдаг “Цэвэр сүлжээ” санаачилгыг сонирхож байгаагаа мэдэгджээ.

Украйны Ерөнхий сайд Денис Шмыгальтэй хийсэн хэлэлцээрийн явцад ийм тохиролцоонд хүрсэн юм байна. Үүнээс өмнө Украйны эрх баригчид ирээдүйн ухаалаг хот барих төсөл дээр “Huawei”-тэй хамтран ажиллахаас татгалзаж, Америкийн “Cisco” компанийг сонгоод нэлээд магтуулсан.

Ингэснээр Украйн нь хоёр том төсөл дээр Хятадын хөрөнгө оруулалт, санаачилгын эсрэг улс төрийн шийдвэр гаргаж байгаа гэдгийг шинжээчид онцолсон байна. Үүний өмнө Украйны эрх баригчид АНУ-ын шахалтаар онгоцны мотор үйлдвэрлэгч “Мотор-Сич” компанийн хувьцааны хяналтын багцыг худалдан авсныг хүчингүй болгосон. Үүний хариуд Хятадын хөрөнгө оруулагчид нь Украйны ЗГ-аас 3,5 тэрбум долларын алдагдлаа нөхүүлэхээр олон улсын арбитрын шүүхэд хандаад байгаа юм.