Нэг удаагийн тариур үйлдвэрлэгчид асар их ашиг олж байна

Корона вирусийн цар тахлын аюулын нөлөөгөөр бизнесийн зарим салбар уналтын байдалд орж, хямарч байгаа ч зарим салбар улам хөгжиж, бүр ч өндөр ашиг олох болсон. Үүний нэг нь тариурын үйлдвэр болсон тухай “Euronews” мэдээлсэн байна. 

 Германы Бад-Арользен дэх тариурын үйлдвэр ингэж ашигтай ажиллаж байгаа үйлдвэрийн нэг жишээ. “Almo” компани нь жилдээ хоёр тэрбум гаруй тариур үйлдвэрлэдэг байсан. Харин одоо дэлхий даяар вакцинжуулалт эхэлж байгаатай холбоотойгоор тариурын эрэлт хэрэгцээ өмнөхөөсөө эрс нэмэгдсэн байна. Одоо тариурын үйлдвэрийн дамжлагаас 13 секунд тутамд 64 ширхэг тариур бэлэн болж гарч байна.

 “Almo” компанийн захирал Отто-Филипп Браун“Euronews”-д ярихдаа “Бид хүчин чадлаа нэн даруй нэмэгдүүлсэн. Долоо хоногийн таван өдөр ажилладаг байснаа долоо хоногийн долоо өдөр ажилладаг болсон. Ингэснээр манай автомат төхөөрөмжүүд хоногийн 24 цаг, долоо хоногийн долон өдөр зогсоо зайгүй ажиллаж байна” гэжээ.

 Мөн тус компани нь зах зээлийн эрэлтийг нөхөхийн тулд үйлдвэрлэлийн шинэ тоног төхөөрөмж авахад 30 сая еврогийн хөрөнгө оруулалт хийхээр төлөвлөөд байгаа юм байна. Одоогоор “Almo” компанийн хамгийн том захиалагчид нь Герман-Америкийн хамтарсан “Pfizer/BioNTech” ба Германы “CureVac” гэсэн вакцин үйлдвэрлэгчид болсон байна.