Естийн халуун рашааны ойролцоо амиа алдсан иргэд 32-36 насных байжээ

Төв аймгийн Эрдэнэ сумын нутаг, Хан Хэнтийн тусгай хамгаалалттай газарт харьяалагдах Естийн халуун рашааны ойролцоо буудалласан 10 залуугийн 5 нь харамсалтайгаар амь насаа алдсан талаар бид мэдээлсэн.

Залуус Естийн халуун рашааны орчимд буудаллан тав нь майханд, тав нь машиндаа хуваагдан хоногложээ. Харамсалтай нь, майханд хоносон 32-36 насны таван иргэн амиа алдсан байна. Тухайн таван залуу  угаартаж амь насаа алдсан  байж болзошгүй нөхцөл байдалтай олдсон талаар Цагдаагийн байгууллагаас хэлж байгаа юм. 

Тодруулбал амиа алдсан таван залуу Монголд үйлдвэрлэсэн "Цаатан" гэдэг нэртэй майханд шахмал  түлш түлж хоносон гэх мэдээлэл байгаа юм. Зэвсэгт хүчний 303 дугаар ангийн нисдэг тэргийг дайчлан 12 хүний бүрэлдэхүүнтэй баг тухайн газар руу явсан бөгөөд залуусыг өнөөдөр /2020.12.22/ хотод авч ирэх юм байна. Залуучууд Естийн халуун рашаанд орох гэж  яваагүй бөгөөд тус рашааны ойролцоо байрлаж хоноглох хооронд харамсалтай явдал тохиолджээ.