Сангийн яамнаас ЭМЯ руу 11 сард 6 тэрбум 590 сая төгрөгийг оношлуурын зардалд шилжүүлжээ

Сангийн яамнаас Эрүүл мэндийн яамны данс руу өнгөрөгч 11 сард оношлуурын зардалтай холбоотой найман удаагийн гүйлгээ хийжээ. Тодруулбал шилэн дансны мэдээлэлд ЭМЯ нь арваннэгдүгээр сард гурван удаа оношлуур худалдан авахаар оношлуурын зардал, тээврийн зардал, дагалдах хэрэгслийн зардал гэх мэт нийтдээ 6 тэрбум 590 сая 269 мянган төгрөгийг Сангийн яамаар шилжүүлүүлжээ. 

Шилэн дансны мэдээллээс авч үзвэл, зөвхөн 11 сард худалдан авсан оношлуурын нийт зардал 6,590,269,704 төгрөг болж байгаа юм.

Сангийн яамнаас 11 дүгээр сарын 11-нд 1 тэрбум 483 сая 40 мянган төгрөгийг “ оношлуур” гэсэн гүйлгээний утгатайгаар ЭМЯ-ны данс руу шилжүүлжээ. Мөн оношлуурын дагалдах хэрэгслийн зардалд 11 сарын 12-нд 647 сая 426 мянган төгрөгийг шилжүүлсэн бол 11 сарын 13-нд 15 сая 319 мянган төгрөгийг тээврийн зардалд шилжүүлсэн байна.

Дахин 11 сарын 17-нд 2 тэрбум 838 сая 888 мянган төгрөгийг оношлуур гэсэн гүйлгээний утгатайгаар ЭМЯ руу шилжүүлж, 11 сарын 18-нд 41 сая 61 мянган төгрөгийг чартер нислэгийн зардалд, харин 11 сарын 18-нд 10 сая 791 мянган төгрөг мөн 41 сая 505 мянган төгрөгийг тээврийн зардалд тус тус шилжүүлжээ.

Дахин буюу гурав дах удаагаа 11 сарын 24-нд 1 тэрбум 624 сая 914 төгрөгийн оношлуурын зардал гэж Сангийн яамнаас эрүүл мэндийн яамны данс руу тус тус шилжүүлжээ. 

Жич: Оношлуур болон түүний дагалдах хэрэгсэл зэргийг улаан сумаар, тээврийн зардлыг таван хошуугаар тэмдэглэв.