Я.Содбаатар: Халдварыг дотроо алдахад юу буруудав гэдгийг судалж, шалгаж байна

Н.Мижидмаа

2020/11/11

Улсын онцгой комиссоос гаргасан шийдвэрийг дөнгөж сая Засгийн газрын хуралдаанаар хэлэлцэж, шийдвэр гаргалаа. Тодруулбал, Засгийн газраас Монгол Улсын хэмжээнд Гамшгийн тухай хуулийн дагуу Бүх нийтийн бэлэн байдлын зэрэг шилжүүлж байгааг албан ёсоор зарлалаа. Засгийн газрын хуралдааны талаар Монгол Улсын Шадар сайд Я.Содбаатар мэдээлэл өглөө. Тодруулбал маргааш /2020.11.12/ өглөөний 06 цагаас таван өдрийн хугацаанд улс орон даяар хатуу хөл хорио тогтоож гамшгаас сэргийлэх бүх нийтийн бэлэн байдлын зэрэгт шилжүүллээ.

Энэ хугацаанд иргэдийг хүнс цуглуулах, эрүүл мэнд, цэвэр усны хэрэгцээг хангахаас бусад тохиолдолд гэрээсээ гарахгүй байхыг зөвлөлөө.

Энэ хугацаанд Улаанбаатар хот, бусад эрсдэлтэй аймгуудад хөл хорио тогтоож байгаа бөгөөд

Эрүүл мэндийн байгууллага,
хүнсний дэлгүүр,
Хүнсний үйлдвэрүүд,
Хүнсний захууд,
Шатахуун түгээх станцууд,
Нефть хангамж,
Эмийн сан,
Худаг усан хангамжийн байгууллагууд,
Түлш, дулаан хангамжийн байгууллагууд,
Хэвлэл мэдээллийн байгууллага,
Орон нутгийн хүнсний хэрэгцээ хангах,
Буяны ажил зэрэг үйлчилгээг хязгаарлахгүй юм байна.

ХӨСҮТ-ийн Тандалт судалгааны албаны дарга А.Амбасэлмаа: Халдвар авсан иргэний ойрын хавьтлыг 48 цагийн дотор тогтоох ёстой. Одоогийн байдлаар халдвар авсан иргэний 73 ойрын хавьтлыг олж илрүүлсэн.Шинжилгээний хариу нь маргааш орой гарна.

Эрүүл мэндийн сайд Т.Мөнхсайхан: Коронавирусийн вакциныг зарим улсууд өөрийн улсдаа туршиж байгаа ч одоогоор албан ёсоор батлагдсан вакцин байхгүй. Бид амжилттай хийгдэж, албан ёсоор батлагдах вакциныг хүлээж байна.

Шадар сайд Я.Содбаатар: Энэ сарын 13-нд Сөүл рүү тусгай үүргийн нислэг үйлдэнэ. Гэхдээ Улаанбаатар луу буцахдаа хүн авч ирэхгүй. Энхсаран сувилалд хяналт суларч дотооддоо алдах эрсдэл үүссэн гэх асуудлыг судалж, хяналт шалгалтын ажлыг эрчимтэй явуулж байна.