Прокурорын тогтоол: Г.Загдааг эрүүгийн хуулийн таван зүйл ангиар буруутгажээ

"Зөв амьдрах ухаан" ТББ-ын тэргүүн Г.Загдаа, түүний эхнэр Г.Амарсайхан нарт холбогдох эрүүгийн хэргийн шүүх хурал маргааш 10 цагт Баянзүрх дүүргийн шүүхэд зарлагджээ.

Д.Загдааг хоёр эмэгтэйд хүч хэрэглэн бэлгийн харилцаанд орсон гэж буруутгаж байна

Г.Загдаа нь иргэн Д.Халиуныг “Би шар хаданд бүртгэлтэй, би хэрэг хүлээх чадваргүй, чи орилж хашгирч болно, би хүүхдийг чинь ч бас ингэж чадна, хүүхдийг чинь алчихсан байхад хэн ч надтай юу ч ярьж чадахгүй” гэж айлган сүрдүүлж, гурван удаа бэлгийн харилцаанд хүчээр орсон. 
Мөн хөгжлийн бэрхшээлтэй иргэн Б.Энхмааг “Чамайг хүүхдээ орхиж явсныг чинь цагдаад хэлээд чамайг шоронд явуулна шүү” гэж хэлээд хүчээр бэлгийн харилцаанд нэг удаа орсон гэх хэргээр яллагдагчаар татагдаад байгаа аж. Түүний энэ үйлдлүүд нь Эрүүгийн  хуулийн ерөнхий ангийн 2.2 дахь зүйлийн гурав дахь хэсэгт заасныг журамлан мөн хуулийн тусгай ангийн 12.1 дүгээр зүйлийн 2 дахь хэсгийн 2.6-д зааснаар яллах тогтоол үйлджээ. 

Д.Загдааг бусдыг эд хөрөнгөө эзэмших эрхэнд  халдсан гэх үндэслэлээр буруутгаж байна

Д.Загдаа нь өөрийн төрийн бус байгууллагаар үйлчлүүлсэн иргэдийн халамжийн дэвтрийг хурааж авчихаад өгдөггүй байсан. Тодруулбал өөрийн эхнэр Г.Амарсайхантайгаа нийлээд 13 иргэний нийгмийн халамжийн дэвтэр, жирэмсэн болон нярай, хөхүүл хүүхэдтэй ээжүүдийн тэтгэмжийн дэвтэр, банкны карт зэргийг авчихаад өгдөггүй байж. Энэ нь бусдын  эд хөрөнгөө эзэмших эрхэнд халдаж буй эрүүгийн гэмт хэрэг гэдэг нь мөрдөн байцаалтын явцад тогтоогджээ. Иймд Г.Загдаа, түүний эхнэр Г.Амарсайхан нарыг Эрүүгийн хуулийн тусгай ангийн 11.7-р зүйлийн 2.1-т зааснаар яллах дүгнэлт үйлджээ.

Мөн дуудлагаар очсон цагдаагийн албан хаагчийн биед халдсан, гудамжид бусдын биед халдсан гэх эрүүгийн хуулийн хоёр ч зүйл заалтаар буруутгаж байгаа аж.