Ирэх жилээс хүүхдийн байцаагч нар ахлах ангиудад хичээл орно

Монгол Улсын Ерөнхий сайд У.Хүрэлсүх өнөөдөр /2020.10.27/ ЦЕГ-ын бие бүрэлдэхүүнтэй цахим уулзалт хийж, үүрэг чиглэл өглөө. Уулзалтад Ерөнхий сайдаас гадна Хууль зүй, дотоод хэргийн сайд Х.Нямбаатар, Ерөнхий сайдын зөвлөх Ц.Нямдорж нар оролцлоо. 

 Хууль зүй, дотоод хэргийн сайд Х.Нямбаатар "Бид өнөөдөр нас биед хүрсэн хүмүүсийн гэр бүлийн хэрүүл шуугианыг хөндлөнгөөс хянах гэхээсээ илүүтэй хүүхдэд чиглэсэн сургалтын ажлыг хийхээр төлөвлөж байна. Ирэх нэгдүгээр сарын 1-нээс ахлах ангийн сурагчдад эрх зүйн зөрчлөөс урьдчилан сэргийлэх хичээлийг оруулахаар хөтөлбөрөө бэлэн болгоод байна. Сая Засгийн газраас хүүхдийн байцаагч нарын орон тоог нэмэгдүүлэх шийдвэр гаргасан. Ирэх жилээс хүүхдийн бацаагч нар ахлах ангиудад хичээл орно. Гэмт хэргээс урьдчилан сэргийлэх ажлыг өөр түвшинд гаргахыг зорьж байгаа. Аймаг, нийслэл, сум, дүүргийн ИТХ гэмт хэргээс урьдчилан сэргийлэх зөвлөлийн мөнгийг дэргэдээ төвлөрүүлж, тэр мөнгөөр нэгнийгээ шагнаж урамшуулдаг, гадаад дотоод томилолтод зарцуулдаг жишиг байгааг өөрчилнө. Энэ мөнгөөр гудамжаар эргүүл хийж байгаа хамтарсан багийн гишүүдийг урамшуулна" хэмээн тодотголоо.