Дагавар хүүгээ хөнөөсөн Б.Хүлгэнд бүх насаар нь хорих ялыг хэвээр үлдээлээ

 Дагавар хүүгээ хөнөөсөн Б.Хүлгэнд бүх насаар нь хорих ялыг хэвээр үлдээлээ. Тодруулбал, Улсын Дээд шүүхийн хяналтын шатны эрүүгийн хэргийн шүүх хуралдаанаар Б.Хүлгэнд холбогдох хэргийг шүүгдэгчийн гаргасан гомдлын дагуу 2020 оны 10 дугаар сарын 23-ны өдөр хянан хэлэлцээд анхан болон давж заалдах шатны шүүхийн шийдвэрийг хэвээр үлдээж шийдвэрлэлээ. Түүнийг  гэр бүлийн хүчирхийлэл үйлдэж, бага насны хүүхдийг санаатай алсан, хүний эрүүл мэндэд хөнгөн хохирол учруулсан болон хүчиндэх гэмт хэргүүдийг үйлдсэн гэм буруутайд тооцож, бүх насаар нь хорих ял оногдуулжээ.

Хэргийг эргэн сануулахад 

Өнгөрсөн оны арванхоёр дугаар сарын 20-ны өдөр Хэнтий аймгийн Хэрлэн суманд бага насны хүүхэд хойд эцэгтээ зодуулан амь насаа алдсан талаар бид мэдээлсэн. Уг хэргийг үйлдэгч Бат-Эрдэнийн Хүлгэн нь 1996 онд төрсөн. 2013, 2015, 2017, 2018 онуудад хулгай, дээрэм, хүчингийн хэргээр нийт зургаан удаагийн ял шийтгэл эдэлж байсан. Тэрбээр 2019 оны зургаадугаар сард хорих ангиас суллагдсан бөгөөд 10 дугаар сараас талийгаач хүүгийн ээжтэй хамтран амьдарч эхэлсэн байна. Талийгаачийн ээж хоёр хүүтэй бөгөөд арванхоёрдугаар сарын 17-ны өдөр Б.Хүлгэн нь бага хүүг нь зодож гэмтээсэн учир хүү эмнэлэгт хэвтэн эмчлүүлж байжээ. Харин хэрэг гардаг өдөр буюу 12 дугаар сарын 20-ны өдөр Б.Хүлгэн, хөвгүүдийн ээжтэй болон найз нөхдийн хамт гэртээ архи, согтууруулах ундаа уужээ. Ингээд талийгаач хүүгийн ээж, хамт байсан иргэнтэй хамт дэлгүүрээс архи авчрахаар гарсан хойгуур Б.Хүлгэн хүүг зодож, амь насыг нь хөнөөсөн байна.