Өвөрхангай, Дундговь аймгаас гарах хөдөлгөөнийг хязгаарлаад байна

Цаг агаарын нөхцөл байдалтай холбогдуулан, хөдөө орон нутгийн зам үзэгдэх орчин хязгаарлагдаж байна. Тэгвэл хөдөө орон нутгийн замын нөхцөл байдал хүндэрсэн эсэх, зарим аймаг сумдын гарах, орох хөдөлгөөнийг хаасан эсэхийг Авто тээврийн үндэсний төв, Тээврийн цагдаагийн албанаас тодрууллаа.

АТҮТ-ийн Хөдөлгөөний удирдлагын хэлтсийн дарга К.Айдос: "Өвөрхангай аймгийн "Шартын даваанд" цаг агаарын нөхцөл байдал хүндэрсэн учраас зорчих хөдөлгөөн удаашралтай байна. Дундговь аймгийн Хулд, Луус сумаас урагш замын нөхцөл хүндэрсэн. Дундговь, Өмнөговь аймгийн нийтийн тээврийн үйлчилгээг хязгаарласан. Гэхдээ зорчигчийн хөдөлгөөн тус чиглэлд үргэлжилж байна.  Маргааш зүүн аймгийн нутгаар цасан шуурга шуурч замын нөхцөл байдал хүндрэх магадлалтай байна. Хол замд гарахаар төлөвлөж байгаа жолооч нартаа хандаж хэлэхэд онцын шаардлагагүй тохиолдолд хол замд зорчихгүй байх, зорчихоор бол хувийн бэлтгэлээ маш сайн базааж гарахыг анхааруулж байна " гэв.

Тээврийн цагдаагийн алба: Өвөрхангай, Дундговь аймгаас гарах хөдөлгөөнийг тус хоёр аймгийн онцгой комиссын шийдвэрээр  хязгаарлаад байна. Одоогийн байдлаар орох гарах хөдөлгөөнийг хязгаарласан өөр аймаг байхгүй. Цаг агаарын нөхцөл хүндрэх магадлалтай байгаа тул жолооч, иргэдийг онцын шаардлагагүй бол хөдөө орон нутагт зорчихгүй, хол замд явахгүй байхыг онцгойлон анхааруулж байна гэлээ.