Барилгын материал үйлдвэрлэлийн улсын зөвлөгөөн болж байна

Барилгын материал үйлдвэрлэлийн улсын зөвлөгөөнийг Архангай аймгийн төв Эрдэнэбулган суманд зохион байгуулж байна. Зөвлөгөөнөөр Барилгын салбарт 2020-2024 онд авч хэрэгжүүлэх бодлого, Барилгын материалын чанарт тавигдах шаардлага, анхаарах асуудал, үйлдвэрлэлд тулгамдаад байгаад асуудал, барилгын хог хаягдлыг дахин боловсруулах зэрэг асуудлуудаар илтгэл тавьж хэлэлцэж байна.  

Монгол Улсын хэмжээнд 2020 оны аравдугаар сарын 1-ний өдрийн байдлаар Барилгын материалын тусгай зөвшөөрөл нь хүчинтэй 522 аж ахуй нэгж байна. Үүнээс Улаанбаатарт 368 нь 154 нь  хөдөө орон нутагт үйл ажиллагаа явуулж байгаа юм.

Барилгын материалын гол нэр төрлийн бүтээгдэхүүнээс арматурын 14 үйлдвэр улсын хэмжээнд үйл ажиллагаа явуулж байна. Монгол Улсад арматурын хэрэгцээ 2012-2020 оны байдлаар дундаж үзүүлэлтээр жилийн хэрэгцээ 200 мянган тонн байдаг аж. 2019 оны байдлаар нийт хэрэгцээний 40 хувийг дотооддоо үйлдвэрлэж байсан бол 2020 онд COVID гарснаас шалтгаалан нэг үйлдвэр үйл ажиллагаа явуулж, нийт хэрэгцээний 5 хувийг хангажээ.

Харин Цементийн таван үйлдвэр байдаг. 2019 онд 2137 тонн цемент үйлдвэрлэж, 2020 онд дөрвөн үйлдвэр үйл ажиллагаа явуулж одоогийн байдлаар  2181 тонн цемент үйлдвэрлэсэн байна. Энэ мэт монголын барилгын материал үйлдвэрлэлийн нөхцөл байдал, цаашид хэрхэн нэмэгдүүлэх, дотоодынхоо үйлдвэрлэгчдийг хэрхэн дэмжих талаар бодлогын төвшинд авч хэлэлцэж байгаа юм.

Зөвлөгөөнд УИХ-ын гишүүн Ё.Баатарбилэг, Барилга хот байгуулалтын сайд Б.Мөнхбаатар, дэд сайд  Э.Золбоо болон тус яамны газрын дарга нар, Барилгын хөгжлийн төвийн Захирал Ц.Амарсанаа, Тэргүүн дэд захирал Б.Ганболд, дэд захирал бөгөөд ерөнхий инженер Б.Энхболд, Дэд захирал М.Ибрай болон 21 аймгийн ГХБХБГ болон бусад албаныхан мөн Барилгын материал үйлдвэрлэгчдийн холбоо, 21 аймгийн барилгын материал үйлдвэрлэгчид гээд нийт 250 гаруй хүн зөвлөгөөнд оролцож байгаа юм.