Д.Трамп: Миний бие эмнэлэгт тийм ч сайнгүй ирсэн

Коронавирусын халдвар авсан нь батлагдаад байгаа АНУ-ын ерөнхийлөгч Дональд Трамп Вашингтоны ойролцоо цэргийн эмнэлэгт эмчлүүлж байна. Тэрээр эмнэлгийн өрөөндөө видео мэдэгдэл хийж твиттер хуудсандаа нийтэлжээ.Трамп мэдэгдэлдээ өөрийнх нь биеийг эмчилж буй эмч, мэргэжилтнүүдэд, бас өөрт нь эрүүл энхийг хүссэн Америкийн иргэд, дэлхийн улс орнуудын удирдагчдад талархал илэрхийлээд түргэн эдгэрээд удахгүй ажилдаа буцаж орох итгэлтэй байгаа гэжээ. Трамп “Миний бие энд ирэхдээ тийм ч сайнгүй байсан бол одоо хамаагүй дээрдээд байна. Тэд намайг эдгээхийн тулд бүхнийг хийж байгаа. Ойрын хэдэн өдөр миний хувьд “жинхэнэ сорилт” байх болно” хэмээгээд тэргүүн хатагтайн бие сайн байгаад хэлээд түүнийг өөрөөсөө залуу хүн тул халдварт өвчний эрсдэл бага гэдгийг онцолсон байна.