Ц.Даваасүрэн: Хүүхдийн мөнгө энд баас болоод, Эрээнд хөрөнгө оруулалт болдог

УИХ-ын гишүүн Ц.Даваасүрэн:

Төсөв дээр хүүхдийн мөнгө байгаа. Энэ жилийн хүүхдийн мөнгө гүйцэтгэлээр 1.9 их наяд хүрсэн байна. Гэвч энэ нь хэрэглээг нэмэгдүүлдэг.  Хүүхдийн мөнгө валютын нөөцийг бууруулж, ханш өсгөж, эргээд ард иргэдэд дарамт болдог. Та нар үүнийг шууд хэлдэг баймаар байна. Тэгэхгүй бол биднийг хэлэхээр улстөржүүлдэг. Хүүхдийн мөнгө энд баас болоод, Эрээнд хөрөнгө оруулалт болдог. Ирэх зургаадугаар сар болтол ахиад нэг их наяд төгрөгийг хүүхдийн мөнгөнд зарцуулах нь. Бид зоригтой арга хэмжээ авч чадахгүй хэр нь халамжийг хавтгайруулж байна. Сум бүрт 1 тэрбум төгрөгөөр таван үйлдвэр барихад асуудал шийдэгдэнэ. 100 мянган төгрөг хэдхэн өдрийн хоол шүү дээ. Ийм юмыг манай санхүүгийн байгууллага хэлдэг баймаар байна. Харин хүүхдийн мөнгийг яг хэрэгцээтэй хэсэгт нь өгдөг бол өөр хэрэг. Ингэж хийдэг Ерөнхий сайд байвал энэ улс орон босоод ирнэ. 

Монголбанкны ерөнхийлөгч Б.Лхагвасүрэн: 

Төв банк оруулж ирж байгаа мөнгөний бодлогоо Төсвийн бодлоготой нийцтэй байхаар тооцож оруулж ирсэн. 2020 оны төсвийн алдагдал 12 хувьтай байгаа. Тиймээс мөнгөний бодлоготой нийцтэй байхын тулд хатуу байлгах ёстой. Гэтэл зөөлөн явж байгаа. Тэр ч утгаараа найман хувь гэж бодлогын хүүгээ зөөллөсөн. Энэ онд Монгол Улсын импорт 11 хувиар буурсан. Хэрэглээний бүтээгдэхүүний импорт 1.6 тэрбум ам.доллар байдаг. Эдийн засгаа ерөнхийд нь дэмжих үүднээс өрхийн орлогыг алдагдуулахгүй хадгалах бодлого барьж хүүхдийн мөнгө олгож байгаа. Үүнд Монголбанк байр сууриа илэрхийлэхгүй. Энэ оны статистикаас харахад өрхийн орлого, хэрэглээ буураагүй байгаа нь эдийн засгийн дарамтыг зөөлрүүлж байна гэж харж байгаа.