Гал түймрийн улмаас хоёр хүн амиа алджээ

Нийслэлийн онцгой байдлын газраас цаг үеийн асуудлаар өнөөдөр мэдээлэл хийлээ.  Энэ он гарснаар Монгол Улсад тарваган тахлын зургаан тохиолдол бүртгэгдсэн. Үүний дагуу Нийслэлийн онцгой комиссоос шуурхай арга хэмжээ авч ажиллан  тарваган тахал болон хүн малын гоц халдварт өвчнөөс урьдчилан сэргийлэх зорилгоор холбогдох захирамжийн дагуу алба хаагчид 24 цаг хяналт тавьж ажиллаж байна.

Мөн цаг агаар хүйтэрч галлагааны улирал эхэлж буйтай холбоотойгоор гал түймрийн дуудлага нэмэгджээ. Өнгөрсөн долоо хоногт нийслэлийн нутаг дэвсгэрт 17 удаагийн гал түймрийн дуудлага  ирсэн байна. Энэ талаар НОБГ-ын Гамшгаас урьдчилан сэргийлэх хэлтсийн дарга, хурандаа Г.Нэргүй “Цахилгаан холболтыг буруу хийснээс болж гал түймэр их гарч байна. Үүнээс гадна үнс нурмаа ил задгай асгасан, цахилгаан ашиглалтын ачаалал ихэсгэсэн зэрэг шалтгаанаас үүдэн гал гарч байгааг анхааруулъя. Өнгөрсөн долоо хоногт гал түймрийн улмаас хоёр хүн амь насаа алдсан" гэв.

Эх сурвалж:www.polit.mn